Kryeministri i Irakut: Nuk do të lejojmë që territori ynë të përdoret për kërcënime ndaj Iranit

Thursday, 05 March 2026 09:47

• Written by Mexhis

Kryeministri i Irakut, Mohammed Shia al-Sudani, deklaroi të mërkurën se Iraku nuk do të lejojë që nga territori i tij të lindë asnjë “kërcënim” kundër Iranit dhe dënoi sulmet e Shteteve të Bashkuara dhe Izraelit ndaj këtij vendi.

Al-Sudani i bëri këto komente gjatë një telefonate me ministrin e Jashtëm të Iranit, Abbas Araghchi, sipas një deklarate të Ministrisë së Jashtme iraniane të publikuar në platformën X të kompanisë amerikane të mediave sociale.

Të dy diskutuan zhvillimet rajonale në sfondin e sulmeve ushtarake të SHBA-së dhe Izraelit kundër Iranit.

Sipas deklaratës, Al-Sudani dënoi agresionin ushtarak ndaj Iranit dhe e cilësoi atë në kundërshtim me rregullat, parimet dhe etikën ndërkombëtare.

“Gjatë telefonatës, kryeministri irakian shprehu ngushëllimet e tij ndaj qeverisë dhe popullit të Iranit për martirizimin e Udhëheqësit Suprem të Republikës Islamike (Ajatollah Ali Khamenei), që ndodhi gjatë sulmit brutal të Shteteve të Bashkuara dhe regjimit sionist kundër Iranit”, thuhet në deklaratë.

Ai theksoi gjithashtu se qeveria irakiane “nuk do të lejojë në asnjë rrethanë që nga kufijtë e Irakut të lindë ndonjë kërcënim ndaj Republikës Islamike”, shtohet më tej.

Nga ana e tij, Araghchi falënderoi qeverinë, popullin dhe autoritetet fetare të Irakut për qëndrimin e tyre në dënimin e sulmeve dhe për shprehjen e solidaritetit me Iranin.

Ai tha se iranianët janë të vendosur të mbrojnë dinjitetin e vendit, sovranitetin kombëtar dhe integritetin territorial.

Araghchi e përshkroi gjithashtu paqëndrueshmërinë në rajon si rezultat të veprimeve të SHBA-së dhe Izraelit dhe theksoi rëndësinë e vigjilencës së vendeve rajonale dhe atyre islame për të parandaluar përpjekjet që synojnë destabilizimin e rajonit dhe krijimin e përçarjeve mes shteteve myslimane.

Izraeli dhe SHBA-ja kanë vazhduar një ofensivë të gjerë kundër Iranit që prej së shtunës, duke shkaktuar të paktën 926 të vrarë, mes tyre edhe Khamenei dhe zyrtarë të lartë ushtarakë.

Irani është kundërpërgjigjur me sulme me dronë dhe raketa, duke goditur objektiva në Izrael si dhe në vendet e Gjirit ku ndodhen baza dhe asete ushtarake amerikane./AA

Turqia i përcjell shqetësimin Teheranit për municionin e neutralizuar iranian pranë hapësirës ajrore turke

Thursday, 05 March 2026 08:58

• Written by Mexhlis

Ministri i Jashtëm turk, Hakan Fidan i përcolli shqetësimin e Ankarasë homologut të tij iranian, Abbas Araghchi lidhur me një municion balistik të lëshuar nga Irani drejt hapësirës ajrore turke që u neutralizua.

Gjatë bisedës telefonike, Fidan i tha Araghchit se çdo hap që mund të çojë në përshkallëzimin e konfliktit duhet të shmanget, thanë burimet e Ministrisë së Jashtme turke.

Read more ...

Ish-koloneli amerikan: “Trump po ju gënjen” – Macgregor paralajmëron katastrofë për SHBA në Lindjen e Mesme

Thursday, 05 March 2026 07:41

• Written by Mexhis

Ish-koloneli i Ushtrisë së SHBA-së dhe analisti ushtarak Douglas Macgregor ka bërë deklarata të forta për situatën në Lindjen e Mesme, duke akuzuar administratën amerikane dhe median se po fshehin realitetin e konfliktit me Iranin.

Në një intervistë që po qarkullon gjerësisht në rrjetet sociale dhe në disa media ndërkombëtare, Macgregor deklaroi se opinioni publik amerikan po mashtron për zhvillimet në terren.

“Trump po ju gënjen — të gjitha bazat tona ushtarake janë shkatërruar,” tha ai, duke shtuar se informacioni që po jepet nga media dhe establishmenti amerikan nuk pasqyron situatën reale në rajon.

Sipas Macgregor, “media kryesore, kontraktorët e mbrojtjes dhe establishmenti po ju gënjejnë për atë që po ndodh realisht në Lindjen e Mesme tani”.

Ai e përshkroi situatën si një zhvillim shumë më të favorshëm për Iranin sesa ishte parashikuar nga strategët amerikanë.

“Është një katastrofë, dhe Irani po ia del shumë më mirë sesa kemi menduar,” deklaroi ish-koloneli.

Macgregor pretendoi gjithashtu se Teherani po përfiton nga mbështetje indirekte nga dy fuqi të mëdha globale.

“Ne nuk po luftojmë vetëm me Iranin. Rusia dhe Kina po qëndrojnë në prapavijë dhe po furnizojnë qeverinë iraniane drejtpërdrejt me inteligjencë satelitore të nivelit të lartë. Ata po ndjekin çdo lëvizje tonën,” tha ai.

Sipas tij, ky rrjet inteligjence po i jep Iranit avantazh në fushën e betejës.

“Për shkak të këtij rrjeti inteligjence, Irani po përjeton suksese të mëdha kundër Izraelit dhe pozicioneve të SHBA-së,” u shpreh Macgregor.

Në deklaratat e tij ai paralajmëroi edhe për një rrezik më të madh strategjik për praninë ushtarake amerikane në rajon.

“Prania jonë në rajon po shembet aq shpejt, saqë Marina Amerikane po detyrohet të tërhiqet drejt porteve indiane vetëm për të mbijetuar,” tha ai.

Në fund të analizës së tij, ish-koloneli paralajmëroi se Shtetet e Bashkuara mund të përfshihen në një konflikt të gjatë dhe të kushtueshëm.

“Kjo është katastrofike. Ne po hyjmë në një luftë të gjatë, të zgjatur dhe të pashpresë në Lindjen e Mesme,” deklaroi Macgregor.

Ai shtoi gjithashtu një kritikë të fortë ndaj industrisë së mbrojtjes në SHBA.

“Kompleksi ushtarako-industrial po brohoret për një masakër, ndërsa ushtarët tanë janë si shënjestra të lehta,” përfundoi ai.

Deklaratat e Macgregor kanë nxitur debat të madh në rrjetet sociale dhe në mediat ndërkombëtare, ndërsa autoritetet amerikane nuk kanë konfirmuar pretendimet e tij për shkatërrimin e bazave ushtarake amerikane në rajon.

Macron: Sulmi ndaj Iranit jashtë të drejtës ndërkombëtare!

Wednesday, 04 March 2026 18:25

• Written by Mexhis

Presidenti francez Emmanuel Macron deklaroi se sulmet amerikano-izraelite ndaj Iranit, që nisën të shtunën dhe që sipas raportimeve çuan në vrasjen e liderit suprem të vendit, janë kryer “jashtë së drejtës ndërkombëtare” dhe se Parisi “nuk mund t’i miratojë ato”.

Megjithëse gjatë një fjalimi në televizionin kombëtar të martën në mbrëmje Macron e fajësoi drejtpërdrejt Iranin për përshkallëzimin e konfliktit në Lindjen e Mesme, kritikat e tij mund të krijojnë tensione me Uashingtonin.

Vendimi i kryeministrit spanjoll Pedro Sánchez për ta cilësuar publikisht luftën si të paligjshme dhe për të ndaluar përdorimin e bazave spanjolle nga avionët amerikanë për sulme ndaj Iranit e shtyu presidentin amerikan Donald Trump të kërcënojë me ndërprerje të tregtisë me Spanjën gjatë një konference për shtyp të martën.

Ndërsa kancelari gjerman Friedrich Merz nuk e mbrojti publikisht Sánchez gjatë konferencës për shtyp në Shtëpinë e Bardhë ku Trump bëri kërcënimin tregtar, Macron duket se po afrohet më shumë me qëndrimin e Spanjës për paligjshmërinë e luftës.

Megjithëse Trump ka deklaruar se beson se konflikti do të zgjasë vetëm disa ditë ose javë, Macron paralajmëroi se përplasja nuk ka një fund të dukshëm.

“Sulmet ka të ngjarë të vazhdojnë në ditët në vijim për të dobësuar Iranin dhe për të shkatërruar aftësinë e tij për kundërsulm. Dhe si përgjigje, sulmet iraniane në të gjithë rajonin pritet të vazhdojnë,” tha Macron.

Për të mbrojtur interesat franceze në Lindjen e Mesme, Macron njoftoi se aeroplanmbajtësja Charles de Gaulle, e vetmja e këtij lloji që ka Franca, po dislokohet në Mesdhe së bashku me avionë luftarakë dhe sisteme të mbrojtjes ajrore.

“Ne do ta vazhdojmë këtë përpjekje për aq kohë sa të jetë e nevojshme,” tha ai.

Macron konfirmoi gjithashtu se Franca ka dërguar sisteme kundërraketë në Qipro, siç ishte raportuar më herët.

“Qiproja, një shtet anëtar i BE-së, një vend me të cilin kemi një partneritet strategjik … kërkon mbështetjen tonë,” tha ai.

Macron theksoi se “kredibiliteti” i Francës është në lojë dhe se Parisi duhet të respektojë marrëveshjet e mbrojtjes me aleatë si Katari, Kuvajti dhe Emiratet e Bashkuara Arabe, ku janë të dislokuar rreth 800 ushtarë francezë.

Dronë iranianë goditën të dielën një bazë detare franceze në Emiratet e Bashkuara Arabe, megjithëse nuk pati të lënduar.

Ministri francez i Punëve të Jashtme Jean-Noël Barrot tha të martën se avionët luftarakë francezë kanë fluturuar mbi Emiratet gjatë fundjavës në kuadër të operacioneve për sigurinë e hapësirës ajrore./Politico.eu