Lidhje


Ardit Gjebrea mori 300 milionë lekë nga Erion Veliaj i Bashkisë Tiranë

 

Ardit Gjebrea, një ndër promovuesit e "pyllit orbital" i cili lulëzoi më shumë beton dhe disa pemë tek tuk për show, është thirrur në SPAK për kontratat sponsorizuese me Bashkinë e Tiranës, ndërsa të dhënat e Thesarit tregojnë se shoqata “Jon Music” ka përfituar në gjashtë transaksione plot 29.970.878 lekë të reja, ose rreth 300 milionë lekë të vjetra. Pagesat lidhen me aktivitete dhe festivale, përfshirë “Kënga Magjike”.

 

Të dhënat e Drejtorisë së Përgjithshme të Thesarit, të publikuara në platformën Open Spending Data, tregojnë se shoqata “Jon Music”, e lidhur me Ardit Gjebrean, ka përfituar pagesa nga Bashkia e Tiranës në gjashtë transaksione të evidentuara. Mes tyre janë 8 milionë lekë më 19 dhjetor 2022 për festivalin “Kënga Magjike 2022”, 6.289.998 lekë më 11 tetor 2021 për festivalin e vitit 2021 dhe 705.880 lekë më 3 dhjetor 2021. Ndërkohë, në vitin 2020 janë kryer dy pagesa prej 2.7 milionë dhe 4.3 milionë lekësh, ndërsa më 29 janar 2019 shoqata ka përfituar 7.975.000 lekë.

 

Në total, gjashtë transaksionet e evidentuara arrijnë në rreth 30 milionë lekë, të cilat tashmë janë pjesë e vëmendjes publike për shkak të verifikimeve të SPAK-ut mbi kontratat me Bashkinë e Tiranës. Çfarë shërbimesh janë paguar, si janë realizuar kontratat dhe çfarë rezultatesh konkrete kanë prodhuar projektet e promovuara? Këto janë pyetjet që kërkojnë përgjigje, jo fotografi të tjera me lopata në duar.


Arrestohet mësuesi i fizkulturës në Vlorë, e denoncuan 7 vajza për ngacmime seksuale brenda në shkollë

 

Vlorë – Një mësues i fizkulturës në Vlorë është nën akuzë për abuzim seksual me fëmijë të mitur.

 

Policia lokale tha se u ndalua shtetasi A. A., 35 vjeç, banues në Vlorë, mësues i edukimit fizik. Noa.al mëson se akuzat janë bërë nga disa vajza nën moshë nç shkollën e bashkuar të Selenicës në Vlorë.

 

Policia konfirmoi se prangosja e të riut erdhi "pasi kanë kallëzuar 7 nxënëse të kësaj shkolle, të moshave 14–17 vjeçe, se ky shtetas i ka ngacmuar seksualisht në ambientet e shkollës".

 

Materialet procedurale iu referuan Prokurorisë pranë Gjykatës së Shkallës së Parë të Juridiksionit të Përgjithshëm Vlorë, për veprime të mëtejshme.

 

 
 


Rama sfidon protestuesit: Nuk jap dorëheqjen, largohem vetëm kur Shqipëria të anëtarësohet në BE!

 

Kryeministri Edi Rama duket i vendosur të mos tërhiqet përballë kërkesave të qytetarëve, studentëve dhe të rinjve për dorëheqjen e tij. Në një konferencë të përbashkët me ambasadoren e BE-së, kreu i qeverisë deklaroi se dorëheqja e një kryeministri të zgjedhur nuk mund të imponohet nga protesta në rrugë. Me këtë qëndrim, Rama duket se u ka mbyllur derën kërkesave të protestuesve, duke zgjedhur të mos japë asnjë sinjal reflektimi për pakënaqësinë që po shprehet në bulevard.

 

Në vend që t'u përgjigjej kërkesave dhe shqetësimeve të qytetarëve, Rama u shpreh se nuk ka marrë shënim asnjë ide apo program për Shqipërinë nga protestat, ndërsa e lidhi qëndrimin e tij në krye të qeverisë me anëtarësimin e vendit në Bashkimin Europian. Ai deklaroi se objektivi është mbyllja e negociatave deri në fund të vitit 2027, duke theksuar se nuk mund të largohet nga drejtimi i ekzekutivit përpara përfundimit të këtij procesi. Një argument që ngre pikëpyetje mbi mënyrën se si kryeministri e sheh përgjegjësinë politike dhe raportin me qytetarët që kërkojnë ndryshim.

 

Gjatë deklaratave të tij, Rama u rikthye edhe te pretendimet për përfshirjen e aktorëve të huaj në protestat në Shqipëri, duke përmendur Iranin dhe atë që e cilësoi si ndërhyrje hibride. Megjithatë, në vend që të ndalej te arsyet e pakënaqësisë qytetare dhe kërkesat për dorëheqje, kryeministri zgjodhi të zhvendoste vëmendjen te faktorët e jashtëm. Qëndrimi i tij rrezikon të thellojë përplasjen me protestuesit, ndërsa mbetet për t'u parë nëse qeveria do të japë përgjigje konkrete për shqetësimet që po artikulohen në rrugë.


Denoncoi videot +18 të Ad Hilës, masakrohet në drru Elton Tozaj

 

Gazetari Elton Tozaj është dhunuar fizikisht pasditen e kësaj të enjteje. Lajmin e ka bërë të ditur vetë ai përmes një postimi në rrjetin social Instagram, ku ka ndarë me ndjekësit një fotografi ku shfaqet i mbuluar në gjak.

 

Deri në këto momente, Tozaj nuk ka bërë publike detaje rreth rrethanave se si ka ndodhur ngjarja apo identitetit të personave që mund të jenë përfshirë në këtë sulm. Megjithatë, foton tronditëse ai e ka shoqëruar me një mesazh të fortë dhe paralajmërues:

“Kushdo që e bëri këtë, do ta paguajë shumë shtrenjtë! Nuk më ndalni dot.”

 

Ky nuk është rasti i parë i dhunës ndaj gazetarit. Edhe më herët, Elton Tozaj është përballur me sulme fizike që i kanë shkaktuar dëmtime serioze. Tozaj është një figurë e njohur në rrjetet sociale dhe opinionin publik, kryesisht për shkak të denoncimeve të tij të forta dhe shpesh të bujshme.

 

Gjatë karrierës së tij, ai ka trajtuar çështje që variojnë nga bota e showbizz-it, si në rastin e shpërthimit të skandalit të Adi Hilës, e deri te aferat e mundshme të politikanëve të njohur.

 

Ngjarja e sotme vjen vetëm pak ditë pas zhvillimesh të tjera ligjore për gazetarin. Gjatë javës së fundit, Elton Tozaj është paditur për shpifje dhe cënim të figurës e dinjitetit nga zëvendësministri i Infrastrukturës dhe Energjisë, Erlind Sulo, si dhe nga Gazmend Paja.

 

Autoritetet ende nuk kanë dalë me një njoftim zyrtar mbi ngjarjen, ndërsa pritet zbardhja e plotë e rrethanave të këtij sulmi ndaj gazetarit.


Del një surrogato që shitet te pushteti”, Lapaj reagon ashpër ndaj ish-aleatit Shabani: Refuzova dy herë Ramën për zv/kryeministër

 

Adriatik Lapaj, kryetar i partisë “Shqipëria Bëhet”, u shpreh me tone të ashpra ndaj ish-aleatit Endri Shabani, në zgjedhjet e kaluara parlamentare, pas të cilave u bë Avokat i Popullit. Ai e cilësoi atë një surrogato që u shit te pushteti. 

 

“Unë personalisht kam hyrë në politikë në këtë për të sjellë një frymë tjetër, sigurisht është mësuar një lloj qenërie tjetër, por unë kërkoj ta shtyj jetën publike drejt bashkëpunimit. Politika nuk mund të jetë mundësia e një grupi egoistësh që bëjnë karrierë dhe llogje në banaqe televizive dhe se si mund të përmirësojnë jetën e tyre.

 

Për mua politika duhet të jetë për njerëzit, për fermerët të cilët janë në fushë dhe nuk marrin subvencione dhe ata nuk kanë kohë që Lapaj a dikush tjetër ta udhëheqë Shqipërinë.

Për mua politika duhet të jetë shpresa edhe për atë pacientin e spitalit onkologjik që nuk ka ilaçe.

 

Politika për mua është që fëmijët të mos ikin më nga Shqipëria. Sot mosha mesatare ka shkuar 45 vjeç. Nëse presim që Shqipërinë ta bëjmë vetëm, nuk ka më popull. Sot po lindin 23 mijë, po vdesin 23 mijë. Ky vend nuk do të ekzistojë më pas 30 vitesh.

 

Ne që jemi këtu, a mund t’u japim shpresë njerëzve, një rreze drite, që të thonë se po, ka djem që lënë mënjanë egon për të rrëzuar një regjim që po rrezikon atdheun? Atdheu është më i rëndësishëm se ne.

 

Ju më thoni mua që del një surrogato që shkon e shitet te pushteti, e të mbaj unë përgjegjësi. Ti duhet të më thuash: “Bravo, Adriatik, që nuk pranove të shkoje zv.kryeministër”. Refuzova dy herë kryeministrin. Edhe sot më vijnë dhe u them përherë JO. Doni ta mendoni politikën si snobizëm? Hajde ta pranojmë”- u shpreh Lapaj.

XS
SM
MD
LG