Lidhje


"Ne të bardhët jemi bërë në laborator", këshilltarja e re e Ramës beson se njerëzimi lindi nga jashtëtokësorët.

 

Këshilltarja e re e Ramës për mediat, Vlerë Gjakova, e emëruar së fundmi, duket se i përket asaj shtrese të shoqërisë njerëzore që beson te alienët dhe për më tepër se ne jemi krijesa të krijuara në laborator, siç thotë në këtë pjesë të emisionit “Rrethi Katror” ku ka bërë pjesë përpara se të njihej si Vlerë e pamohueshme e qeverisjes Rama.

 

“Raca jonë e bardhë nuk është racë e tokës, por jemi bërë në laborator”- thotë Vlera e qeverisë.


Dhunoi studentët protestues, arrestohet shefi i Policisë Kriminale në Serbi

 

Kreu i Policisë Kriminale në Serbi, Marko Kriçak, është arrestuar me urdhër të Prokurorisë, pas akuzave të rënda për dhunë dhe keqtrajtim të studentëve protestues, si dhe shpërdorim detyre. Sipas mediave serbe, Kriçaku dhe zëvendësi i tij, Bosko Sekuloviç, dyshohen gjithashtu për pengim dhe manipulim të hetimeve për një vrasje të lidhur me mafien.

 

Në qendër të akuzave për dhunë është një episod i gushtit 2025, kur efektivë të Njësisë për Mbrojtjen e Personave dhe Objekteve (JZO), e drejtuar në atë kohë nga Kriçaku, tërhoqën zvarrë një grup studentësh dhe i dërguan në bodrumin e godinës së qeverisë në Beograd. Kriçaku dyshohet se ka drejtuar personalisht operacionin, ka goditur një studente dhe e ka kërcënuar me përdhunim. Prokuroria e akuzon për keqtrajtim dhe intimidim të protestuesve paqësorë.

 

Arrestimi i tij vjen pas muajsh tensionesh dhe protestash studentore në Serbi, ku dhuna ndaj demonstruesve ka qenë një nga çështjet më të debatueshme. Kriçaku konsiderohej një nga njerëzit e afërt të Aleksandar Vuçiçit në radhët e policisë, ndërsa arrestimi i tij shihet si një zhvillim i rëndësishëm në një moment kur opozita e mbështetur nga studentët ka fituar shumicën parlamentare.


Khamenei kërcënon SHBA-në dhe Izraelin: Çdo sulm ndaj Iranit do të marrë përgjigje pa kufij gjeografikë

 

Udhëheqësi suprem i Iranit, Mojtaba Khamenei, ka lëshuar një paralajmërim të fortë ndaj Shteteve të Bashkuara dhe Izraelit, duke deklaruar se çdo kërcënim ndaj Teheranit do të përballet me një kundërpërgjigje të menjëhershme dhe të fuqishme, pavarësisht vendndodhjes së objektivave. Deklarata vjen në një periudhë tensionesh të larta, ndërsa Uashingtoni dhe Tel Avivi po shqyrtojnë mundësinë e një operacioni të ri ushtarak kundër Iranit.

 

Sipas agjencisë shtetërore IRNA, Khamenei zhvilloi të shtunën një takim me komandantët e lartë ushtarakë, të cilëve u kërkoi të rrisin gatishmërinë për një përballje të mundshme. Ai udhëzoi gjithashtu përditësimin e listës së objektivave amerikane dhe izraelite, duke përfshirë të gjitha llojet e aseteve fizike dhe jofizike. Udhëheqësi iranian theksoi se, në rast të një konflikti të ri, do të jetë vetë Irani ai që do të përcaktojë kohën dhe kushtet e përfundimit të tij. 

 

Paralelisht me retorikën e ashpër ushtarake, nga Teherani po vijnë edhe sinjale për përparim në përpjekjet diplomatike me Uashingtonin, të ndërmjetësuara nga Katari. Ministri i Jashtëm iranian, Abbas Araghchi, deklaroi se Irani mund të pranojë rihapjen e Ngushticës së Hormuzit brenda 48 orëve, nëse arrihet një marrëveshje për këtë çështje. Ai i cilësoi gjithashtu përpjekjet amerikane për të hapur rrugën e dialogut si një zhvillim pozitiv, megjithëse sqaroi se për momentin nuk ka plane për bisedime të drejtpërdrejta me përfaqësuesit e SHBA-së. 

 

Ndërkohë, kreu i Këshillit të Lartë të Sigurisë Kombëtare të Iranit, Mohsen Rezaei, konfirmoi se kishte marrë një letër nga zëvendëspresidenti amerikan JD Vance, me propozime për rifillimin e negociatave. Rezaei e cilësoi ndryshimin e tonit të komunikimit amerikan si një shenjë pozitive, por paralajmëroi se çdo sulm i ri ndaj Iranit do të pasohej nga “goditje shkatërruese” ndaj agresorit, duke përdorur armë të reja. 

 

Një nga pikat kryesore të negociatave mbetet Ngushtica e Hormuzit, përmes së cilës kalon një pjesë e rëndësishme e furnizimit botëror me naftë. Teherani këmbëngul që lëvizja e anijeve në këtë rrugë ujore të bëhet sipas një korridori të dakordësuar me Omanin dhe nën menaxhimin iranian. Kërkesa për kontrollin e kalimit detar mbetet një prej çështjeve më të ndjeshme në përpjekjet për arritjen e një marrëveshjeje me Uashingtonin. 


Kosova: shumicë myslimane, por raport më i ulët i objekteve të kultit për besimtar

 

Myslimanët përbëjnë shumicën dërrmuese të popullsisë së regjistruar në Kosovë. Megjithatë, krahasimi me vlerësimet e publikuara për objektet e kultit sugjeron se komunitetet e krishtera kanë më shumë objekte në raport me numrin e besimtarëve. Shifrat kërkojnë kujdes, pasi të dhënat demografike dhe inventarët e objekteve u përkasin periudhave të ndryshme.

 

Sipas tabelës së përkatësisë fetare të ReKos 2024, nga 1.585.566 banorë të regjistruar, 1.482.276 janë deklaruar myslimanë, ose 93,49%. Ortodoksët numërojnë 36.683 persona, ndërsa katolikët 27.815, përkatësisht 2,31% dhe 1,75%. Kategoritë e tjera, personat pa besim dhe ata që nuk janë përgjigjur përbëjnë së bashku rreth 2,45%.

 

Për numrin e xhamive, një raportim i vitit 2021, që citon përfaqësuesin e Bashkësisë Islame të Kosovës, Fatmir Ilijazi, jepte vlerësimin prej rreth 830 objektesh. Në këtë numër përfshiheshin xhamitë aktive, ato në ndërtim ose rindërtim, si dhe objektet pasive për shkak të dëmtimeve apo zbrazjes së vendbanimeve.

 

Ndërkohë, botimi Republic of Kosovo – Facts and Figures 2020, i fondacionit Konrad Adenauer dhe partnerit të tij ekonomik gjermano-kosovar, përmend 150 kisha ortodokse, 50 katolike dhe 24 protestante, duke iu referuar statistikave të vitit 2017. Këto janë të dhëna të mëhershme, që kërkojnë përditësim për të përcaktuar gjendjen aktuale.

 

Duke bashkuar këto vlerësime, katër kategoritë arrijnë në 1.054 objekte: rreth 78,75% xhami dhe 21,25% kisha. Ky total është një përllogaritje nga burime të viteve të ndryshme, jo një inventar i unifikuar i të gjitha objekteve fetare.

 

Raporti për banor e bën më të dukshëm ndryshimin. Nëse përdoren 830 xhami dhe numri i myslimanëve të regjistruar, rezultojnë rreth 5,6 xhami për çdo 10.000 myslimanë. Për ortodoksët dhe katolikët së bashku, 200 kishat e vlerësuara kundrejt 64.498 personave të regjistruar japin rreth 31 kisha për çdo 10.000 pjesëtarë të këtyre dy komuniteteve.

 

Shifra prej 21,6 kishash për çdo 10.000 të krishterë, që qarkullon në këtë krahasim, nuk mbështetet nga llogaritja e paraqitur. Përdorimi i gjithë popullsisë jomyslimane si emërues do të përfshinte edhe persona pa besim dhe pa përgjigje.

 

Një kufizim tjetër është mbulimi i regjistrimit: ASK sqaron se tabela e përkatësisë fetare nuk përfshin vlerësimet për banorët e paregjistruar të katër komunave veriore. Prandaj, krahasimi mbetet orientues; një tablo përfundimtare kërkon numërim të përditësuar të objekteve, mbulim të njëjtë territorial dhe dallim mes ndërtesave aktive, monumenteve historike dhe ambienteve të përshtatura për rite.

 


Protesta e së shtunës, arrestohen 6 persona, 3 procedohen penalisht

 

Gjashtë persona janë arrestuar, ndërsa tre të tjerë janë proceduar penalisht dhe dy janë shpallur në kërkim, pas akteve të dhunës gjatë protestës së zhvilluar ditën e djeshme në Tiranë. Sipas njoftimit të policisë, protestuesit kundërshtuan efektivët duke i goditur me sende të forta, lëndë piroteknike, bomba molotov si dhe bllokuan qarkullimin dhe dogjën koshat e mbeturinave.

 

Mësohet se, mes të arrestuarve janë edhe dy të mitur dhe një shtetas i huaj. Gjatë kontrolleve, policia sekuestroi bomba molotov, të cilat iu gjetën dy prej të arrestuarve. Hetimet vijojnë për identifikimin e personave të tjerë të përfshirë, ndërsa materialet procedurale i janë referuar Prokurorisë për veprime të mëtejshme.

 

NJOFTIM: 

Tiranë / Kundërshtuan dhe goditën me sende të forta, lëndë piroteknike, bomba molotov, sfera dhe vida metalike punonjësit e Policisë, bllokuan qarkullimin dhe dogjën kazanë mbeturinash; arrestohen 6 shtetas, procedohen penalisht 3 të tjerë dhe shpallen në kërkim 2.

Sekuestrohen bomba molotov.

 

Në vijim të veprimeve hetimore dhe procedurale, të kryera nën drejtimin e Prokurorisë, për dokumentimin ligjor të akteve të dhunës gjatë tubimit të zhvilluar ditën e djeshme, u arrestuan shtetasit:

A. Sh., 26 vjeç, L. K., 18 vjeç, F. Ç., 38 vjeç, K. R., 35 vjeç (shtetas i huaj), si dhe 2 shtetas të mitur.

 

Gjithashtu, u proceduan penalisht 3 shtetas dhe u shpallën në kërkim 2 të tjerë.

Gjatë kontrolleve, shtetasve L. K. dhe A. Sh. iu gjetën dhe iu sekuestruan bomba molotov.

 

Specialistët për Hetimin e Krimit, në bashkëpunim me Prokurorinë, vijojnë veprimet për dokumentimin e plotë të veprimeve të kundërligjshme të kryera gjatë tubimit, identifikimin e shtetasve të tjerë të përfshirë dhe vënien e tyre përpara përgjegjësisë ligjore.

 

Materialet procedurale iu referuan Prokurorisë për veprat penale “Vrasja e punonjësit të Policisë”, e mbetur në tentativë, “Organizimi dhe pjesëmarrja në grumbullime e manifestime të paligjshme”, “Prishja e qetësisë publike”, “Kundërshtimi i punonjësit të Policisë së rendit publik”, “Shkelja e rregullave mbi lëndët plasëse dhe djegëse”, “Pengimi i qarkullimit të mjeteve të transportit”, “Shkatërrimi i pronës me zjarr” dhe “Mbajtja pa leje dhe prodhimi i armëve shpërthyese dhe i municionit”.

 

XS
SM
MD
LG