Lidhje


Qeveria kalon Aktin Normativ: Fshirje postimesh në rrjete sociale dhe gjoba deri në 500 mijë lekë

 

Qeveria ka miratuar me procedurë urgjente një Akt Normativ me fuqinë e ligjit që ndryshon rrënjësisht rregullat për organizimin e tubimeve në Shqipëri, duke shtrënguar maksimalisht masat ndaj protestuesve dhe organizatorëve.

 

Vendimi i firmosur nga Kryeministri Edi Rama i jep kompetenca të zgjeruara Policisë së Shtetit për të bllokuar protestat pranë institucioneve, për të larguar persona të caktuar nga zona publike, si dhe për të ndërhyrë deri në rrjetet sociale për fshirjen e mesazheve që konsiderohen me "thirrje për dhunë".

 

Perimetër sigurie deri në 72 orë dhe largim nga zonat e mbrojtura

Sipas ndryshimeve në ligjin nr. 8773 "Për tubimet":

 

  • Ndalim protestash rreth institucioneve: Drejtuesi i policisë vendore, me miratimin e prefektit, mund të ndalojë ose kufizojë tubimet rreth institucioneve arsimore, shëndetësore apo shtetërore për deri në 72 orë, nëse vlerëson se ka rrezik real për dhunë apo dëmtim prone.

  • Urdhër largimi 48-orësh: Efektivët e policisë marrin të drejtën të nxjerrin urdhër të shkruar largimi (deri në 48 orë) nga stacionet e transportit, aeroportet, shkollat e zonat kulturore për çdo person që ushtron presion, kanosje apo pengon aksesin.

 

Policia kontroll mbi mediat sociale dhe filim të protestave

Një nga pikat më debatuara të aktit normativ është ndërhyrja në komunikimet digjitale:

 
  • Mesazhet në rrjete sociale: Policia e Shtetit, pasi të identifikojë llogaritë ose numrat e telefonit që shpërndajnë thirrje për dhunë, do t'u dërgojë mesazh mbajtësve duke i kërkuar fshirjen e menjëhershme të përmbajtjes. Në rast refuzimi, ndaj tyre do të ndërmerren masa ligjore.

  • Regjistrim audiovizual: Çdo paralajmërim për shpërndarje tubimi apo akt dhune do të incizohet me mjetet e policisë dhe do të përdoret si provë ligjore.

 

Fatura e re e penaliteteve: Gjobat "fluturojnë" deri në 500 mijë lekë

Sanksionet financiare për pjesëmarrësit dhe organizatorët janë shumëfishuar:

  • Pjesëmarrja në tubim të ndaluar ose mosbindja: Gjobë nga 10,000 deri në 100,000 lekë.

 

  • Protestuesit me maska/identitet të fshehur: Mosbindja ndaj urdhrit të policisë kur personi ka fytyrën e mbuluar dënohet me gjobë nga 50,000 deri në 500,000 lekë. (Fshehja e identitetit lejohet vetëm për arsye shëndetësore, fetare ose profesionale, përfshirë gazetarët).

  • Bllokimi i rrugëve: Çdo person që merr pjesë në bllokimin e akseve rrugore do të gjobitet me 5,000 lekë për çdo ditë bllokimi.

 

Akti normativ hyn në fuqi menjëherë pas botimit në Fletoren Zyrtare, ndërsa vendimet e policisë për kufizimin e tubimeve mund të ankimohen brenda 48 orëve në Gjykaten Administrative, pa pezulluar zbatimin e tyre.

 


Si u gjunjëzua Rama nga protestat për taksën e naftës, në 2022 betohej: Nuk hiqet sa të jetë kjo qeveri

Gjatë ditëve tensionuara të marsit 2022, kur qytetarët dhe drejtuesit e mjetit mbushën sheshet e rrugët në protestë kundër rritjes stratosferike të çmimeve të karburantit, kërkesa kryesore ishte e qartë: heqja e taksës së qarkullimit nga çmimi i naftës. Por përballë këtij revolti popullor, kryeministri Edi Rama zgjodhi arrogancën dhe prerjen e çdo shprese.

 Më 12 mars 2022, gjatë një daljeje publike, ai u shpreh me tone prerëse:

 

12 MARS 2022


"Taksa e naftës nuk hiqet! S'ka protestë me drita iPhone-i e bllokim rrugësh me goma X5 që e zhbën atë... Sa të jetë këtu kjo qeveri, taksa e naftës nuk hiqet, as me protesta."

Teksa tubimet vazhdonin dhe presioni publik shtohej, Rama iu rikthye sërish çështjes dy ditë më vonë, më 14 mars 2022. 

 

Duke sfiduar hapur qëndresën e qytetarëve, ai e mbylli çdo shteg për negociata me një tjetër betim publik:

 

14 MARS 2022
 "Edhe po të zgjasë protesta deri në vitin 2025, taksa e naftës nuk hiqet! Ajo taksë mban sistemin e infrastrukturës dhe buxhetin e shtetit."

Megjithatë, ajo që dikur shpallej si e pamundur dhe e padiskutueshme "sa të jetë kjo qeveri", sot u bë realitet. Në një kthesë të fortë nga qëndrimet e tij të mëparshme, Rama deklaroi sot ndryshimin e skemës së taksimit, duke u përpjekur ta vishte këtë tërheqje me mantelin e suksesit ekonomik:

 

SOT
 "Një lajm shumë i pritur, që nuk e sjell dëshira e qeverisë, as dëshira ime – se dëshirën e kemi pasur gjithnjë – po e sjell rritja e ekonomisë: Do të heqim taksën e qarkullimit nga çmimi i naftës dhe do ta ulim automatikisht 32 lekë në pompë çmimin e naftës, ndërkohë që taksën do ta rikthejmë tek makina dhe do ta mbledhim përmes Drejtorisë përkatëse të Transportit Rrugor. Nga ana tjetër, do të vendosim një taksë të re qarkullimi, siç e ka gjithë Europa, për makinat e huaja që hyjnë në territorin e Republikës së Shqipërisë."

 

Deklarata e sotme vë përballë dy realitete: betimet e vjetra se taksa e naftës nuk do të hiqej kurrë përballë protestave, dhe vendimin e sotëm që zbaton pikë për pikë atë që qytetarët kërkonin vite më parë.


5 akuza për 15 raste, por Balluku mposht drejtësinë dhe i shpëton burgut

Belinda Balluku, ish-zëvendëskryeministrja që përballet me pesë akuza penale për 15 raste të dyshuara, është paraqitur në SPAK e shoqëruar nga avokati Ardian Kalia, për t’i komunikuar mbylljen e hetimeve. Pra Balluku sot i shpëtoi burgut. Dosja pritet të kalojë në Gjykatën e Posaçme, ndërsa publiku pret të shohë nëse drejtësia do të shkojë deri në fund apo do të mjaftohet me procedura, shkresa dhe konferenca. Sepse në Shqipëri, kur bëhet fjalë për qytetarët e zakonshëm, drejtësia shpesh duket e shpejtë në ndëshkim, por kur në skenë dalin emra të rëndësishëm të pushtetit, pritja kthehet në një provë durimi.

 

Akuzat për shkelje të barazisë në tendera, korrupsion dhe çështje që lidhen me pasurinë janë tepër serioze për t’u trajtuar si një episod i radhës në serialin e pafund të politikës shqiptare. Por pyetja që rëndon mbi institucionet nuk është vetëm sa akuza janë ngritur, por nëse ato do të marrin përgjigje përmes një procesi të drejtë, të pavarur dhe pa standarde të dyfishta. Qytetarët nuk kanë nevojë për spektaklin e dosjeve që kalojnë nga një institucion në tjetrin; kanë nevojë të shohin se ligji nuk njeh tituj, poste, miqësi apo pushtet. Drejtësia nuk matet me numrin e faqeve të një dosjeje, por me guximin për ta çuar atë deri në fund.

 

Dhe ja ku vjen pyetja që nuk shuhet, po burgu për Belinda Ballukun, apo edhe kjo çështje do të bëhet një tjetër maratonë juridike pa fund? Askush nuk mund të shpallë fajtor një person pa një vendim gjyqësor, por askush nuk mund t’i kërkojë as publikut të duartrokasë vetëm sepse hetimet po mbyllen. SPAK-u duhet të provojë akuzat, gjykata të vendosë mbi provat dhe drejtësia të tregojë se është e barabartë për të gjithë. Sepse nëse ligji është i fortë vetëm për të dobëtit dhe i kujdesshëm deri në pafundësi për të pushtetshmit, atëherë problemi nuk është vetëm te një dosje, por te besimi i një shoqërie të tërë. Në fund, qytetarët nuk kërkojnë spektakël me pranga, por drejtësi pa imunitet nga përgjegjësia.

 


Nga Vlora në Bregun Perëndimor/ “Trashëgimia e gurëve” si shembull i një trashëgimie të gabuar

 

Historia e hebrenjve në Vlorë dhe Shqipëri tregon se komunitetet e vogla mund të kenë ndikim të madh në marrëdhëniet urbane, tregtare dhe a/morale të një vendi. Por nëse shohim më thellë, ajo histori na mëson edhe diçka tjetër, ndikimi kulturor, sado i fortë, nuk është i garantuar që të mbetet gjithmonë i shndritshëm. Nëse toka që e pret është e varfër shpirtërisht, farat e kulturës së huaj mund të shndërrohen në hije ose kaos. Dhe nëse kultura që mbillet humbet ndjeshmërinë, ajo mund të kthehet në arrogancë.

 

Vlora, dikur priti hebrenjtë sefardikë që sollën gjuhë, tregti, shkrim e dije, mundet të jetë një shembull i gjallë i ndikimit negativ 'të një pakice ndaj një shumice'. Ajo është zgjeruar në trup, por është tkurrur në shpirt. Në Vlorë diku gjuanin me gurë (fishekzjarre, plumba) për sherr, për inat, për “sport” si një pasqyrë e një boshllëku të brendshëm që nuk di më të komunikojë me fjalë. Dikur adoleshentët në mënyrë krejt të pa mend prisnin pemë të sapo vëna sikurse këta kolonë hebrenj bëjnë një veprim që nuk e kuptojnë.

Read more ...


Qeveria kërkon imunitet për Guvernatorin: pavarësi e Bankës apo mburojë nga drejtësia?

Qeveria ka dorëzuar zyrtarisht në Kuvend një nismë të re ligjore, e cila parashikon vendosjen e imunitetit për Guvernatorin e Bankës së Shqipërisë, duke kufizuar masat shtrënguese dhe arrestimin ndaj tij për vendimet apo veprat që lidhen me ushtrimin e funksionit.

 

Projektligji, i cili ka buruar si një propozim i vetë Bankës së Shqipërisë, ka ndezur menjëherë debate në opinionin publik dhe politik, kryesisht për shkak të pikëpyetjeve që ngre mbi ndikimin e mundshëm në hetimet penale dhe pavarësinë e drejtësisë.

 

Çfarë parashikon neni 72 i projektligjit?

Në qendër të këtij debati qëndron Neni 72 i projektligjit, i cili përcakton se Guvernatori do të gëzojë mbrojtje nga arrestimi me burg, arresti në shtëpi apo çdo masë tjetër shtrënguese, në rast se akuzohet për vepra penale që lidhen me ushtrimin e detyrës së tij.

 

Sipas kësaj nisme, procedura do të funksionojë në mënyrë të ngjashme me atë të deputetëve: do të jetë Kuvendi i Shqipërisë ai që do të japë ose jo miratimin përfundimtar për arrestimin, pasi të vlerësojë nëse vepra penale për të cilën akuzohet ka apo jo lidhje direkte me funksionin e tij zyrtar. Për shembull, nëse një akuzë ka të bëjë me vepra si shpërdorimi i detyrës apo korrupsioni i lidhur me funksionin, vendimi kalon detyrimisht përmes filtrit të Kuvendit. Ndërkohë, për vepra të zakonshme jashtë funksionit zyrtar (siç mund të jetë një aksident rrugor), imuniteti nuk do të zbatohet.

 

Mbrojtje për institucionin apo për individin?

Duke folur mbi këtë nismë, Zv. Guvernatorja e Parë e Bankës së Shqipërisë, Holta Zaçaj, e cila është njëkohësisht ish-anëtare e Gjykatës Kushtetuese, është shprehur se kjo nuk përbën një imunitet klasik personal, por një dispozitë garantuese.

 

"Arsyeja pse mbrohet guvernatori, nuk mbrohet për shkak të të qenies së tij guvernator, mbrohet për shkak të elementit që të funksionojë i pavarur pa frikën që një ditë një organ i një pushteti tjetër vjen dhe e pengon... Ne mbrojmë institucionin duke mbrojtur guvernatorin," u shpreh ajo, duke theksuar se qëllimi kryesor është ruajtja e pavarësisë dhe shmangia e presioneve mbi institucionin më të lartë financiar në vend.

 

Nisma pritet të kalojë në komisionet parlamentare dhe në seancë plenare, ku opozita dhe aktorët institucionalë pritet të diskutojnë gjerësisht mbi balancën midis nevojës për pavarësi të bankës qendrore dhe parimit të llogaridhënies para ligjit.

XS
SM
MD
LG