Lidhje


Kosova dhe Shqipëria, diferenca kur Policia dështon

 

Gazmend Hoxha jep dorëheqjen nga drejtimi i Policisë së Kosovës, në një kohë kur vendi është tronditur nga vrasja e Arlinda Zekajt dhe dyshimet për neglizhencën e institucioneve që duhej ta mbronin. Kryeministri Albin Kurti e ka pranuar kërkesën e tij për largim nga detyra, ndërsa 11 zyrtarë policorë janë pezulluar pas rekomandimit të Inspektoratit Policor. Në vend të Hoxhës është caktuar Fehmi Hoti si ushtrues detyre i drejtorit të përgjithshëm. Një vendim që rikthen në qendër të vëmendjes përgjegjësinë e drejtuesve të institucioneve përballë dështimeve që kushtojnë jetë njerëzish.

 

Një panoramë krejt tjetër paraqitet në Shqipëri, ku përgjegjësia në nivelet e larta të Policisë së Shtetit rrallë shoqërohet me dorëheqje për dështimet institucionale. Përkundrazi, reagimi politik shpesh është mbështetja publike dhe vlerësimi për uniformat blu, edhe në situata kur ngjarje të rënda ngrenë pikëpyetje mbi funksionimin e policisë.

 

Dallimi është te standardi i llogaridhënies. Në Kosovë, pas një tragjedie që ngre dyshime për mosveprim institucional, drejtuesi më i lartë i policisë largohet nga detyra, ndërsa përgjegjësitë po hetohen në disa nivele. Në Shqipëri, qytetarët shpesh përballen me një realitet tjetër, kritikat ndaj policisë trajtohen si sulme politike, ndërsa mbështetja e qeverisë bëhet më e dukshme se kërkesa për përgjegjësi. Dhe pikërisht këtu qëndron pyetja, kush mban përgjegjësi kur institucionet që duhet të garantojnë sigurinë e qytetarëve dështojnë? Sepse besimi te uniformat blu nuk ndërtohet me duartrokitje nga qeveria, por me drejtësi, transparencë dhe llogaridhënie.


Shpërthimi i godinës i mori jetën 3 shqiptarëve: Arrestohet bashkombasi, grabiti tubat e gazit

 

Shqiptari Kolian Ilia është një nga tre personat e arrestuar në Greqi, të dyshuar për përfshirjen në shpërthimin e fuqishëm që tronditi lagjen Plaka të Athinës më 25 shtator, ku humbën jetën gjashtë persona, tre prej të cilëve shqiptarë.

 

Së bashku me Ilian janë arrestuar edhe dy shtetas grekë, përkatësisht 37 dhe 55 vjeç. Sipas dyshimeve të hetuesve grekë, tre personat kanë ndërhyrë në sistemin e furnizimit me gaz të një ndërtese, me qëllim vjedhjen e tubave të bakrit.

Kjo ndërhyrje dyshohet se ka dëmtuar tubacionin, duke shkaktuar rrjedhjen e gazit natyror. Gazi është grumbulluar brenda godinës dhe, disa orë më vonë, ka shkaktuar një shpërthim të fuqishëm.

 

Ngjarja e rëndë ndodhi në orët e para të mëngjesit të 25 shtatorit, në rrugën Lysikratous, ku shpërthimi shkaktoi shembjen e ndërtesës dhe la pas gjashtë viktima.

Mes tyre ishin edhe tre shqiptarët Florin Hoxha, motra e tij Florida Hoxha dhe Eris Cani, bashkëshortja e Florinit e cila ishte shtatëzënë.

 

Tre të arrestuarit pritet të dalin gjatë ditës së sotme para gjykatës, ku do të shqyrtohet masa e sigurisë ndaj tyre.

Ata përballen me akuza të rënda, mes të cilave zjarrvënie, shkaktim të shpërthimit me pasoja fatale dhe vrasje me dashje eventuale. Hetimet vijojnë për të zbardhur plotësisht rrethanat e tragjedisë që u mori jetën gjashtë personave, mes tyre edhe tre shqiptarëve.


Igli Tare “porositi” vilën, 3 muaj pasi Balluku “llastohej” me pishinën, roli i çiftit Arbër Abazi-Lorela Reçi

 

Ish-futbollisti Igli Tare këmbëngul se ai është pronar i vilës në Palasë, për të cilën Prokuroria e Posaçme dyshon se është në pronësi reale të ish-zv.kryeministres Belinda Balluku, dhe e fshehur në bazë të veprimeve fiktive.

 

Detajet e lexuara në dosjen hetimore tregojnë se argumentat e ish-lojtarit të Kombëtares çalojnë në mënyrë të dukshme.

 

Tare ka deklaruar para grupit hetimor se vilën 188/1 në kompleksin rezidencial “Green Coast” e ka porositur me kontratën e datës 26 nëntor 2020. Për të argumentuar qëndrimin e tij, Igli Tare ka paraqitur edhe një kopje të kontratës, duke argumentuar se ai i ka pasur të gjitha mundësitë financiare për të blerë godinën, në shumën paraprake 250 mijë euro.

 

Por, dokumentat e paraqitura nga Tare bien ndesh me një tjetër gjetje të Prokurorisë së Posaçme.

Në datë 14 Shtator 2020, pra rreth 3 muaj përpara se Igli Tare thotë se ka nënshkruar kontratën e porosisë me kompaninë investiture, arkitekti Alban Eftimi i dërgon një e-mail Belinda Ballukut, e cila në atë kohë ishte numri dy i qeverisë dhe Ministre e Infrastrukturës.

 

“Po të dërgoj një rishikim. Kemi idenë që, edhe nëse një ditë vendos ta japësh me qera, përdoruesit të mund të ndihen “të llastuar”, njësoj si në hotel”.

Më tej, në mesazhin elektronik, arkitekti i prezanton Ballukut edhe një mori detajesh të tjera teknike, që lidhen me shkallët, vaskat, sallonin, tarracën e të tjera pjesë të godinës.

 

“Një pjesë e mirë e ambienteve rreth pishinës janë veshur me teak për një feeling pak më të ngrohtë e pak si jaht. Shihe si alternativë kur të përfundojmë edhe renderat dhe nëse s’të ngjit, kthehemi te mermeret blu”.

 

Në vijim të këtij argumenti, SPAK-u evidenton edhe foljet e përdorura në mesazhin e Eftimiut, drejtuar Ballukut. “Nëse vendos ta japësh”, “…Shihe…”, “…Nëse s’të ngjit” tregojnë se komunikimi zhvillohet ndërmjet këtyre dy personave dhe jo personazheve të tretë.

 

Si hyn në “lojë” Arbër Abazi

Diku nga fillimi i vitit 2023, kur Igli Tare kishte kryer “formalisht” një pjesë të kësteve për vilën në Palasë, mes palëve investitore dhe porositëse pati një “ngërç”, i cili, për Prokurorinë e Posaçme, është gjithashtu i sajuar.

 

“Porositësi”, pra Igli Tare, pretendonte se punimet në vilë nuk ishin sipas kushteve të rëna dakord. Për këtë arsye, në lojë hyn kompania “Alko Impeks General Construction”, në pronësi të Arbër Abazit.

Kjo shoqëri mori përsipër të kryente punimet në vilën 188/1 në Green Coast. Igli Tare thotë se lidhjen e tij me Arbër Abazin e ka kryer Belinda Balluku.

 

“Unë me Belindën njihemi që në vitin 1988 dhe kemi një raport shumë të ngushtë miqësor. Ajo më lidhi me Arbër Abazin për të kryer punimet në vilë, pasi bashkëjetuesja e biznesmenit, Lorela Reçi, është vajzë e tezes e Ballukut”, ka shpjeguar Tare gjatë një seance pyetjesh në Prokurorinë e Posaçme.

 

Nga ai moment, Lorela Reçi mori kontrollin për të gjithë proceset e rregullimit të vilës. Ajo mbante komunikime me firma të ndryshme që do të kryenin punime për dritaret, dyert, muret e të tjera detaje teknike.

Vlera e punimeve, sipas llogaritjeve të kryera nga ekspertët e SPAK-ut, arrin nga 288 mijë euro deri në 410 mijë euro.

Në çdo rast, Lorela Reçi përmendente termin “klienti porosit…” ose “klienti sugjeron…”, pa e specifikuar në asnjë rast emrin e tij apo të saj.

Prokuroria e Posaçme ka krijuar bindjen se “klienti” ishte Belinda Balluku dhe jo ai që kishte nënshkruar kontratën e porosisë, Igli Tare.

 

Grupi hetimor ka konstatuar se, ndërkohë që kryheshin rregullimet në vilë, Igli Tare nuk rezulton të jetë interesuar asnjëherë se çfarë po ndodhte me punimet.

Ndërkohë, Prokuroria e Posaçme kishte zbuluar një aferë të dyshuar korruptive mes Ballukut dhe Arbër Abazit. Pak para se Abazi të merrej me punimet në vilë, kompania e tij, “Alko Impeks General Construction” ishte pjesë e Bashkimit të Operatorëve që kishin fituar tenderin për ndërtimin e “Lotit 7 të Unazës së Madhe të Tiranës”, me fond limit 2.3 miliardë lekë të reja ose rreth 25 milionë euro.

 

Kjo procedurë u zhvillua nga Autoriteti Rrugor Shqiptar, një strukturë nën kontrollin e Ministrisë së Infrastrukturës, së drejtuar nga Belinda Balluku. ARRSH, në atë kohë, drejtohej nga Evis Berberi, i arrestuar për “shkelje të barazisë në tendera”, përfshirë edhe procedurën për Lotin 7 të Unazës së Madhe, të fituar nga Arbër Abazi dhe kompania e tij, “Alko Impeks General Construction”.

 

Gjatë hetimeve për tenderat e ARRSH-së, Prokuroria e Posaçme ka siguruar të dhëna të shumta, të cilat tregojnë se “shtetasja BelindaBalluku, nën cilësinë e Ministrit të Infrastrukturës dhe Energjisë, në bashkëpunim me shtetasin Evis Berberi, nën cilësinë e titullarit të autoritetit kontraktor, me detyrën e Drejtorit të Përgjithshëm të Autoritetit Rrugor Shqiptar, kanë ndjekur dhe orientuar në vijimësi procedurëne prokurimit, që në fazën përgatitore, gjatë zhvillimit të procedurës, në fazën e dorëzimit dhe vlerësimit të ofertave, me qëllim favorizimin e operatorite konomik fitues të kësaj procedure prokurimi, bashkimin e operatorëve ekonomikë“Alko-Impex General Construcion”dhe “2T” sh.p.k”.

 

Mbi bazën e këtyre të dhënave, Prokuroria e Posaçme arriti të krijonte bindjen për një trekëndësh, të përbërë nga Igli Tare, Arbër Abazi dhe Lorela Reçi, ku secili ka pasur rolin e tij për të mbuluar vilën në pronësi reale të Belinda Ballukut.

 

Në përmbledhjen e tij, SPAK-u thotë se Igli Tare ka kryer kontratë fiktive për të porositur vilën në kompleksin turistik, të paktën 3 muaj pasi Belinda Balluku diskutonte me arkitektin Alban Eftimi për detajet e pishinës së vilës dhe të tjera teknikalitete të ndërtesës.

 

Arbër Abazi fitoi tender 25 milionë euro për ndërtimin e Lotit 7 të Unazës së Madhe, në shkelje flagrante të ligjit dhe në favorizim të plota nga Balluku. Pas fitimit të tenderit, kompania e tij, “Alko Impeks General Construction” merr përsipër të gjitha punimet ndërtimore në vilën “e porositur” nga Igli Tare, por që dyshohet se është e Ballukut.

 

Lorela Reçi, bashkëjetuese e Arbër Abazit dhe njëkohësisht vajzë e tezes së Belinda Ballukut, menaxhon të gjithë punimet në vilën 188/1 në Green Coast.

Pak ditë më parë, Prokuroria e Posaçme mbylli hetimet për Ballukun, duke e akuzuar zyrtarisht për “shkelje të barazisë në tendera” në 9 raste, “Korrupsion pasiv i zyrtarëve të lartë shtetërorë”, “Fshehje pasurie” dhe “Pastrim të produkteve të veprës penale”.

 

Belinda Balluku është hetuar në gjendje të lirë. Në Mars 2026, shumica parlamentare socialiste, nën urdhërimin e kryeministrit Edi Rama, refuzoi kërkesën e Prokurorisë së Posaçme për autorizimin për arrestimin e deputetes Balluku.

 


Izraeli në ngërç politik pas zgjedhjeve, 4 skenarët për daljen nga kriza.

 

Izraeli mund të përballet me javë, madje edhe muaj të tërë pasigurie politike, pasi rezultatet përfundimtare të zgjedhjeve tregojnë se nuk ka një fitues të qartë.

Asnjëri prej dy blloqeve kryesore politike, njëri i udhëhequr nga partia e djathtë Likud e kryeministrit Benjamin Netanyahu dhe tjetri nga partia e qendrës Yashar, e drejtuar nga rivali i tij kryesor, Gadi Eisenkot, nuk ka arritur të sigurojë shumicën e nevojshme prej 61 mandatesh për të formuar qeverinë në parlamentin izraelit me 120 vende.

 

Por si mund të formohet qeveria e re?

Sigurisht, kjo nuk duket e lehtë. Ndarjet e thella politike dhe ideologjike e bëjnë pothuajse të pamundur krijimin e një koalicioni që në pamje të parë mund të dukej i realizueshëm.

 

Megjithatë, kjo mbetet e mundur, edhe nëse rezultati do të ishte një aleancë e brishtë, e cila mund të qëndronte në pushtet vetëm për pak më shumë se një vit. Nëse drejtuesit e partive nuk arrijnë të gjejnë një zgjidhje brenda 12 javëve që kanë në dispozicion, izraelitët do t'u drejtohen sërish kutive të votimit.

CNN ka listuar katër skenarët e mundshëm që mund të shmangin zgjedhjet e parakohshme.

 

Skenari 1: Një qeveri e opozitës

Në teori, rruga më e sigurt për opozitën për të larguar Netanyahun nga pushteti kalon përmes bashkëpunimit mes partive hebraike dhe arabe. Por pikërisht kjo përbën pengesën më të madhe.

 

Dy prej drejtuesve të partive të djathta në bllokun opozitar, ish-kryeministri Naftali Bennett dhe ish-ministri i Mbrojtjes Avigdor Liberman, kundërshtojnë çdo qeveri që varet nga mbështetja e dy partive arabe në parlament. Lista e Përbashkët dhe Raam, qoftë si pjesë e koalicionit, apo si mbështetëse të jashtme të një qeverie të pakicës.

 

Të dy liderët i kanë ashpërsuar qëndrimet e tyre pas sulmit të 7 tetorit 2023, të udhëhequr nga Hamasi.

Vetëm një qeveri në historinë e Izraelit ka përfshirë plotësisht një parti arabe. Raam ishte pjesë e një koalicioni me tetë parti, i cili arriti ta largonte Netanyahun nga pushteti në vitin 2021, por qeveria u rrëzua pak më shumë se një vit pas formimit.

 


“Sekret shtetëror” urdhri për transferimin e Veliajt në burgun e Fierit/ Klodiana Lala: Klasifikimi ngre dyshime, vendimi mund të shkojë përtej Drejtorisë së Burgjeve

 

Gazetarja Klodiana Lala, e ftuar në emisionin “Të Paekspozuarit” në Vizion Plus, ka komentuar transferimin e kryebashkiakut të Tiranës, Erion Veliaj, nga paraburgimi i Durrësit në burgun e Fierit, duke ngritur dyshime mbi arsyet dhe rrethanat e kësaj vendimmarrjeje.

Sipas Lalës, transferimi i një personi të paraburgosur është kompetencë e Drejtorisë së Përgjithshme të Burgjeve dhe kryhet mbi bazën e një analize risku, duke marrë parasysh nivelin e sigurisë së institucioneve penitenciare dhe rrezikshmërinë e personit.

 

“Ekskluziviteti për një të paraburgosur i përket Drejtorit të Përgjithshëm të Burgjeve. Kjo bëhet mbi bazën e një analize risku. Për shkak të mënyrës se si funksionon Drejtoria e Burgjeve, ndahen në burgje të sigurisë së lartë, të zakonshme ose të ulët. Për shkak të funksionit, Veliaj është vendosur në atë që njihet si burgu i zyrtarëve, në paraburgimin e Durrësit”, u shpreh Lala.

 

Gazetarja solli në vëmendje edhe rastin e ish-presidentit Ilir Meta, duke theksuar se ai ka qenë ndër të paktët funksionarë të lartë të mbajtur në institucionin e paraburgimit 313 në Tiranë.

Ajo shpjegoi se vendimi për transferimin e Veliajt është marrë nga drejtuesja e re e Drejtorisë së Përgjithshme të Burgjeve, mbi bazën e një analize risku. Megjithatë, sipas saj, një nga problematikat kryesore lidhet me mungesën e aktit të transferimit dhe klasifikimin e urdhrit si sekret shtetëror.

“Ligji thotë që personi i paraburgosur duhet të ketë në dispozicion aktin e transferimit, përse transferohet dhe kur do të dërgohet. Në rastin konkret, Veliaj nuk e ka pasur në dispozicion këtë akt të transferimit”, deklaroi gazetarja.

 

Lala theksoi se, në pamje të parë, procedura mund të duket e rregullt, por fakti që urdhri është klasifikuar sekret shtetëror ngre pikëpyetje mbi arsyet që kanë çuar në transferimin e kryebashkiakut.

“Në pamje të parë, transferimi i Veliajt duket i rregullt, por mendoj se do të tejkalojë Drejtorinë e Burgjeve, pasi tha se urdhri i transferimit klasifikohet sekret shtetëror. Kjo bëhet vetëm kur personi ka hetim të hapur dhe, për shkak të përgjimit apo formave të tjera të dokumentacionit, ka të dhëna dhe indicie që mund t’i shërbejnë një hetimi penal. Nuk e dimë nëse jemi përpara një rasti të tillë”, u shpreh ajo.

 

Sipas gazetares, në rastet kur Prokuroria ka një hetim të hapur dhe disponon të dhëna për veprimtari të mundshme kriminale, dokumentacioni përkatës mund të klasifikohet. Megjithatë, ajo sqaroi se nuk ka informacion nëse transferimi i Veliajt lidhet me një situatë të tillë.

Lala e lidhi gjithashtu kohën e transferimit me qëndrimet e fundit publike të kryebashkiakut të Tiranës, duke theksuar se reagimet e tij lidhur me protestën dhe kritikat indirekte ndaj kryeministrit Edi Rama i kanë shtuar dyshimet për motivet e vendimit.

 

“Fakti që erdhi në një moment kur Veliaj reagoi për protestën dhe ishte kritik me Ramën në mënyrë indirekte, më kanë lindur dyshime se nuk është një transferim normal”, deklaroi Lala.

Duke shpjeguar procedurat që ndiqen pas transferimit të një të paraburgosuri, gazetarja tha se personi nuk vendoset menjëherë në një ambient me të dënuarit, por fillimisht mbahet në një dhomë vëzhgimi, ku vlerësohet gjendja e tij fizike, mendore dhe shëndetësore.

 

Sipas Lalës, pas përfundimit të këtij procesi dhe vlerësimit të rreziqeve të mundshme, autoritetet vendosin për sistemimin e të paraburgosurit në qeli.

Ajo theksoi se, për shkak të funksionit publik që Veliaj ka ushtruar, institucionet përgjegjëse duhet të marrin masa të veçanta sigurie, jo për ta favorizuar, por për të shmangur çdo rrezik të mundshëm ndaj tij.

 

“Kur ato binden se nuk ka rrezik potencial për shtetasin Veliaj, Drejtoria e Burgjeve e vendos në qeli të veçantë. Për shkak të funksionit që ka pasur, duhet të trajtohet ndryshe, jo për ta favorizuar, por kur ka funksionarë që mund të bëhen objekt urrejtjeje e me radhë, duhet të qëndrojnë në një qeli më vete”, tha Lala.

 

Gazetarja u ndal edhe te profili i personave që mbahen në burgun e Fierit, duke deklaruar se në këtë institucion ndodhen persona të përfshirë në çështje të rënda kriminale, përfshirë drejtues të dyshuar të organizatave kriminale, persona të dënuar apo të akuzuar për përdhunime dhe trafik droge.

 

“Në burgun e Fierit ka personazhe që nga krerët e organizatave kriminale, te përdhunuesit, trafikantët e drogës, e me radhë”, u shpreh ajo.

Lala përmendi gjithashtu se në këtë institucion është transferuar edhe Ergys Agasi, ndërsa mes personave që ndodhen aty përmendi ish-zyrtarë të lartë të policisë, Julian Shpatarakun, persona të lidhur me dosjen “Plumbi i Artë”, si dhe me grupet kriminale të Shkodrës.

 

Sipas saj, prania e personave me profile të tilla e bën edhe më të rëndësishëm hartimin e një raporti të detajuar sigurie për kryebashkiakun e Tiranës.

Në përfundim, gazetarja theksoi se transferimi i Veliajt nga një institucion paraburgimi në një tjetër nuk përbën domosdoshmërisht një veprim të pazakontë. Megjithatë, ajo nënvizoi se klasifikimi i urdhrit të transferimit si sekret shtetëror është elementi kryesor që i ngre dyshime.

 

XS
SM
MD
LG