Lidhje


Buxheti mbi 10 mld euro - Pensionet, pagat e policisë dhe investimet marrin më shumë fonde në vitin 2027

 

Projektbuxheti i vitit 2027 parashikon për herë të parë shpenzime publike mbi 10 miliardë euro, me fokus te pensionet, mbrojtja sociale, arsimi, shëndetësia dhe investimet publike. Ministri i Financave, Petrit Malaj, e prezantoi dokumentin në Komisionin për Çështjet Ligjore dhe Administratën Publike, ndërsa të ardhurat buxhetore parashikohen në rreth 9.4 miliardë euro.

 

Sipas projektbuxhetit, ekonomia shqiptare pritet të rritet me 4% gjatë vitit 2026, ndërsa e njëjta normë parashikohet edhe për periudhën 2027–2029. Në gjysmën e parë të vitit 2026, rritja ekonomike arriti në 3.6%, e mbështetur kryesisht nga konsumi, investimet dhe turizmi. Ndërkohë, investimet e huaja direkte u rritën me 50.8%, duke arritur në 1.1 miliardë euro.

 

Një nga pikat kryesore të buxhetit është mbështetja për pensionistët. Nga 1 janari 2027 parashikohet dyfishimi i bonusit mujor për pensionistët, sipas kategorive përkatëse, me një kosto vjetore prej 20 miliardë lekësh. Gjithashtu, indeksimi i pensioneve parashikohet të nisë në prill, në vend të korrikut, me një fond shtesë prej 1.35 miliardë lekësh. Në total, këto dy masa do t’i kushtojnë buxhetit rreth 24 miliardë lekë, ose 250 milionë euro.

 

Projektbuxheti parashikon gjithashtu dyfishimin e pagesave për fëmijët me aftësi të kufizuara, mbështetje mujore për fëmijët deri në moshën pesë vjeç dhe rreth 1.3 miliardë lekë për strehimin social. Për mbrojtjen sociale janë planifikuar 279.7 miliardë lekë, rreth 30% e shpenzimeve të përgjithshme buxhetore.

 

Në arsim, financimi parashikohet të arrijë në 93.7 miliardë lekë, me rritje prej 3.8 miliardë lekësh. Fondet shtesë do të përdoren për bursat e studentëve nga familjet në nevojë, përmirësimin e infrastrukturës shkollore dhe programin “Pas Shkollës”. Ndërsa për shëndetësinë janë parashikuar 87.2 miliardë lekë, gjashtë miliardë më shumë se financimi i mëparshëm, për barna, pajisje mjekësore dhe rehabilitimin e ndërtimin e 20 spitaleve.

 

Rritje financimi parashikohet edhe për Policinë e Shtetit. Buxheti i sektorit arrin në 36.7 miliardë lekë, ndërsa 3.3 miliardë lekë shtesë do të përdoren për rritjen e pagave të punonjësve të policisë. Mbi 8,500 punonjës me gradën inspektor parashikohet të përfitojnë rritje prej 20 mijë lekësh të pagës bazë, ndërsa kategoritë e tjera do të përfitojnë shtesa sipas gradave.

 

Investimet publike për vitin 2027 parashikohen në mbi dy miliardë euro, ose 6.9% të Prodhimit të Brendshëm Bruto. Financimi do të përqendrohet te infrastruktura rrugore, ujësjellësit, kanalizimet dhe projektet energjetike. Për bujqësinë janë planifikuar 17.9 miliardë lekë, me mbështetje për fermerët, kompensimin e TVSH-së dhe përmirësimin e sistemeve të ujitjes e kullimit. Ndërkohë, buxheti i mbrojtjes parashikohet në 76.7 miliardë lekë, ose 2.35% të PBB-së.

 

Paralelisht me projektbuxhetin, qeveria ka propozuar edhe një paketë fiskale me ndryshime në tatimin mbi dividendin, të ardhurat personale, TVSH-në dhe taksat mbi automjetet. Ndër masat kryesore janë rritja e tatimit mbi dividendin nga 8% në 15%, rritja e normës standarde të TVSH-së nga 20% në 21% dhe ulja e pragut të regjistrimit në TVSH nga 10 milionë në pesë milionë lekë. Për 54 produkte të shportës bazë propozohet një normë e reduktuar prej 6%.

 

Në aspektin fiskal, Malaj bëri të ditur se synohet ulja e borxhit publik në 52.4% të PBB-së dhe mbajtja e deficitit buxhetor në 2.3%. Projektbuxheti synon të kombinojë mbështetjen sociale me investimet publike dhe reformat ekonomike, në funksion të objektivit për integrimin e Shqipërisë në Bashkimin Evropian.

 


Vlora Hyseni do "të dalë nga shtëpia", prokurorët Altin Dumani e Bledar Maksuti kërkojnë kohë për gjyqin në Apel

 

Ish-kryespiunia e Shqipërisë, Vlora Hyseni i është drejtuar me një kërkesë Gjykatës së Posaçme të Apelit, për lehtësim të masës së sigurisë. Ajo ndodhet aktualisht në "Arrest në shtëpi" dhe nga shkalla e dytë e drejtësisë, kërkon zbutje të masës.

 

Mirëpo, siç raportohet, seanca pritet të mos zhvillohet pasi dy prokurorët që përfaqësojnë akuzën, Altin Dumani dhe Bledar Maksuti nga SPAK, kanë kërkuar më tepër kohë për të përgatitur dosjen e kundërshtimit të zbutjes së masës së sigurimit.

 

Vlora Hyseni mori drejtimin e SHISH-it në prill të vitit 2023, duke u bërë gruaja që do të drejtonte institucionin përgjegjës për informacionin dhe sigurinë kombëtare të vendit. Më herët, ajo kishte ndërtuar karrierën e saj në strukturat e inteligjencës së Kosovës dhe kishte shërbyer edhe si këshilltare për sigurinë kombëtare pranë kryeministrit Edi Rama.

 

Referuar komunikatës zyrtare të SPAK, për Vlora Hysenin janë caktuar masat e sigurisë “Arrest në shtëpi” dhe “Pezullim i ushtrimit të një detyre a shërbimi publik”, si person nën hetim për veprat penale të parashikuara nga nenet 302/2 dhe 295/a/1 të Kodit Penal.

 

Nenet 302/2 dhe 295/a/1 të Kodit Penal bëjnë fjalë për Përkrahje të autorit të krimit, në këtë rast Ergys Agasi, në mënyrë që ai t'i shpëtojë kërkimit, kapjes ose arrestimit, si dhe Zbulimi i akteve ose të dhënave sekrete, dhënia e informacioneve të konsideruara sekret ndaj personave të tretë, sërish në këtë rast Ergys Agasi.

 

Vlora Hyseni akuzohet për këto dy vepra penale dhe ndaj saj janë caktuar dy masat e sigurisë të mësipërme.


A e kërcënoi pastori për llogari të Edi Ramës? Toni Gogu takon Veliajn në burgun e Fierit dhe i kërkon dorëheqjen

 

Ministri i Drejtësisë, Toni Gogu, ka zhvilluar një takim me kryebashkiakun e Tiranës, Erion Veliaj, në burgun e Fierit, ku ky i fundit ndodhet pas transferimit të papritur nga paraburgimi i Durrësit.

 

Sipas burimeve të VNA, gjatë takimit Gogu i ka kërkuar Veliajt të japë dorëheqjen nga posti i kryetarit të Bashkisë së Tiranës.

Takimi merr një rëndësi të veçantë politike, jo vetëm për shkak të funksionit që mban Gogu, por edhe për mesazhin që dyshohet se i është përcjellë kryebashkiakut pas hekurave.

 

A ishte kjo një kërkesë personale e ministrit të Drejtësisë, apo Toni Gogu kishte marrë përsipër t’i përcillte Veliajt një mesazh të Edi Ramës?

 

Pyetja bëhet edhe më e fortë në kontekstin e zhvillimeve të fundit, kur transferimi i Veliajt nga Durrësi në Fier shkaktoi përplasje brenda vetë Partisë Socialiste. Vetëm pak ditë më parë, Bledi Çuçi i kërkoi llogari Gogut për procedurën e transferimit, duke shkuar deri te kërkesa për dorëheqjen e ministrit.


Kompania “Myrto Security” merr 2 milionë € nga qeveria

 

Pavarësisht se në qershor të vitit 2026 iu hoq licenca për shkelje të rënda të konstatuara gjatë një përplasje, kompania private e sigurisë “Myrto Security” ka arritur të marrë një pjesë të majmë nga fondet publike. Institucioni i Drejtorisë Rajonale të Operatorit të Sistemit të Shpërndarjes (OSSH) në Elbasan njoftoi pak ditë më parë lidhjen e kontratës me bashkimin e operatorëve “Juer Security” dhe “Myrto Security”, për shërbimin e ruajtjes fizike të ndërtesave, aseteve, personelit dhe pronave të OSSH-së e Furnizuesit të Shërbimit Universal në këtë qytet.

 

Procedura e hapur në gusht 2026 kapte një fond limit prej 184.735.036 lekësh të reja (rreth 1.99 milionë euro), ku kushti kryesor i pjesëmarrjes ishte pajisja me licencën 1.3 A , dokumenti zyrtar që i lejon kompanitë private të ofrojnë ruajtje fizike të objekteve dhe individëve. Absurdi i këtij tenderi qëndron pikërisht te ky kriter, pasi vetëm dy muaj më parë Policia e Shtetit i kishte hequr licencën “Myrto Security” pas ngjarjeve të rënda të regjistruara gjatë protestave.

 

Megjithatë, përmes një manovre ligjore, “Myrto Security” e kundërshtoi vendimin e heqjes së licensës në rrugë gjyqësore dhe siguroi një masë sigurimi padie, duke pezulluar heqjen e lejes dhe duke garuar lirisht në gusht 2026. Sot, e njëjta kompani që dështoi të zbatonte rregullat elementare të sigurisë dhe që u bë protagoniste e një prej ngjarjeve më makabre të dhunës, merr përsipër ruajtjen e aseteve strategjike shtetërore në Elbasan, duke ngritur pikëpyetje të forta mbi ligjshmërinë e procedurës dhe mënyrën se si plotësohen kriteret në tenderët publikë.


Britania shtrëngon rregullat e emigracionit, deri në 15 vite pritje për lejen e qëndrimit të përhershëm

 

Ministrja e Brendshme britanike, Shabana Mahmood, pritet të bëjë sot një deklaratë për ndryshimet e reja në ligjet e emigracionit, me fokus kryesor kufizimin e kushteve dhe zgjatjen e periudhës së pritjes për marrjen e lejes së qëndrimit të përhershëm në Mbretërinë e Bashkuar.

 

Masat, të prezantuara fillimisht në nëntor të vitit 2025, parashikonin zgjatjen e periudhës pesëvjeçare të pritjes për të përfituar statusin e qëndrimit të përhershëm (Indefinite Leave to Remain – ILR).

Ky status u jep emigrantëve të drejtën për të jetuar, punuar dhe studiuar në Britani pa kufizim kohor, si dhe mundësinë për të përfituar nga disa skema të ndihmës sociale.

 

Sipas propozimeve fillestare, punonjësit e huaj në sektorin e kujdesit social mund të përballeshin me një periudhë pritjeje deri në 15 vjet për të fituar të drejtën e qëndrimit të përhershëm. Megjithatë, sipas informacioneve të bëra publike, propozimet mund të zbuten dhe të përjashtojnë nga rregullat e reja punonjësit e kujdesit social që jetojnë tashmë në Britani.

 

Sekretarja e Strehimit, Angela Rayner, kishte kritikuar më herët zbatimin prapaveprues të këtyre rregullave, duke e cilësuar atë si “un-British” (jo britanike), veçanërisht në rastet kur preken emigrantët që ndodhen tashmë në vend.

 

Mahmood kishte argumentuar se zgjatja e afatit për marrjen e statusit të përhershëm ishte e nevojshme për shkak të numrit të lartë të emigrantëve që mbërritën në Britani në mënyrë të ligjshme dhe që po i afroheshin përmbushjes së kushteve për qëndrim të përhershëm.

 

Sipas saj, rritja e emigracionit neto pas Brexit-it, gjatë qeverisjes së mëparshme konservatore, kishte krijuar një situatë që kërkonte ndryshime në sistem. Ministrja paralajmëroi se kjo mund t’i kushtojë taksapaguesve deri në 10 miliardë paund gjatë gjithë jetës së personave përfitues, duke iu referuar të dhënave të Komitetit Këshillimor për Migracionin (Migration Advisory Committee).

 

Në një fjalim në muajin mars, Mahmood deklaroi se Britania kishte përjetuar gjatë periudhës 2021-2024 nivele emigracioni që më parë ishin regjistruar përgjatë katër dekadave.

 

Ajo shtoi se gjatë pesë viteve të ardhshme, rreth 350 mijë punonjës me kualifikim të ulët dhe familjarët e tyre, të cilët kishin mbërritur në Britani përmes vizave të shëndetësisë dhe kujdesit social, do të përmbushnin kushtet për të kërkuar statusin e qëndrimit të përhershëm, duke fituar edhe të drejtën për të përfituar nga disa skema sociale.

 

Konsultimi publik njëvjeçar i qeverisë për reformat e propozuara ka marrë më shumë se 200 mijë përgjigje.

Deklarata e sotme e Shabana Mahmood pritet të sqarojë se cilat prej masave fillestare do të mbeten në fuqi, nëse do të ketë përjashtime për emigrantët që jetojnë dhe punojnë tashmë në Britani dhe sa do të ndryshojë periudha e pritjes për marrjen e statusit të qëndrimit të përhershëm.

 

XS
SM
MD
LG