Lidhje


Mashtrim gjigant në Evropë/ 1 milion telefona të përdorur janë shitur si të rinj

 

Zyra e Prokurorit Publik Evropian (EPPO) zbuloi të martën një rrjet kriminal që ka shitur më shumë se 1 milion telefona celularë të përdorur si të rinj në të gjithë Evropën, duke shkaktuar dëme deri në 300 milionë euro.

 

Rreth 1 770 oficerë policie dhe doganash morën pjesë në operacionin e koduar "Troja", i cili ka kryer deri tani më shumë se 160 kërkime në 19 vende evropiane duke arrestuar 7 persona, përfshirë udhëheqësit e dyshuar të organizatës.

 

Sipas EPPO-së, rrjeti mblodhi telefona celularë nga komponentë të përdorur në Hong Kong dhe Emiratet e Bashkuara Arabe, të cilët më pas i ripaketoi dhe i dërgoi në Holandë. Pajisjet më pas u transportuan në depo në Gjermani dhe u shitën nëpërmjet platformave online në të gjithë Bashkimin Evropian.

 

Rrjeti dyshohet se përdorte kompani fasade në Austri, Bullgari, Gjermani, Holandë dhe Zvicër për të shfrytëzuar një regjim të TVSH-së të destinuar për produktet e dorës së dytë. EPPO tha se telefonat ishin shitur si të rinj dhe për këtë arsye taksa duhej të ishte vendosur mbi çmimin total të shitjes dhe jo vetëm mbi marzhin e fitimit.

 

Skema vlerësohet të ketë shkaktuar humbje prej më shumë se 30 milionë eurosh në të ardhurat nga TVSH-ja në disa vende të BE-së, me humbje vetëm në Gjermani që arrijnë në të paktën 25 milionë euro. Sipas gazetës gjermane “Die Welt”, autoritetet sekuestruan rreth 10 000 deri në 15 000 pajisje nga një depo në Krefeld në Gjermaninë perëndimore. 


Presidenti sirian: Siria dhe Izraeli kishin arritur gati 90 për qind të marrëveshjes, por pala izraelite u tërhoq

 

"Kishte disa raunde negociatash me Izraelin dhe pothuajse arritëm në 90 për qind të marrëveshjeve", tha presidenti sirian, Ahmed al-Sharaa.

Presidenti i Sirisë, Ahmed al-Sharaa tha të martën se Siria dhe Izraeli kishin arritur marrëveshje prej afro 90 për qind në negociatat për një kornizë sigurie, para se Izraeli të tërhiqej ose të paraqiste kushte shtesë.

 

"Kishte disa raunde negociatash me Izraelin dhe pothuajse arritëm në 90 për qind të marrëveshjeve", tha Al-Sharaa në një panel të Këshillit Atlantik në New York, duke shtuar se Izraeli më pas u tërhoq nga marrëveshja për "arsye të ndryshme".

"Që nga rënia e regjimit të mëparshëm, Izraeli po përsërit sulmet dhe agresionet ndaj Sirisë. Ai po pushton territore të reja", tha ai duke shtuar se Izraeli vazhdon të kryejë inkursione, arrestime dhe bombardime brenda Sirisë.

 

"Siria ende zgjodhi të ndjekë rrugën e diplomacisë dhe ta zgjidhë këtë problem përmes dialogut dhe negociatave. Ne ende jemi të angazhuar në këtë proces, por duhet të mbrojmë sigurinë dhe të drejtat e sirianëve. Para kësaj, nuk mund të flasim për paqe", shtoi Al-Sharaa.

Ai tha se negociatat e drejtpërdrejta me Izraelin nisën rreth një vit më parë ndërsa Damasku fillimisht kërkoi tërheqjen e Izraelit në vijat që mbante në vitin 1974, para se të diskutoheshin marrëveshjet e sigurisë.

 

"Nëse këto marrëveshje do të kishin sukses, atëherë mund të hynim në diskutime për një paqe të qëndrueshme. Lartësitë e Golanit janë territor sirian sipas njohjes së Kombeve të Bashkuara. Prandaj, nuk ka diskutim se kujt i përket ky territor", tha presuidenti sirian.

Ai propozoi krijimin e një komiteti ndërkombëtar për të vlerësuar shqetësimet e sigurisë së Izraelit dhe për të "verifikuar se çfarë është vetëm perceptim dhe çfarë janë shqetësime reale".

 

Duke iu përgjigjur një pyetjeje për njohjen nga administrata e Trumpit të sovranitetit izraelit mbi Golanin, Al-Sharaa tregoi një shaka që i kishte bërë presidentit amerikan Donald Trump gjatë një takimi në Shtëpinë e Bardhë: "Pse nuk ua jepni New Jersey-n izraelitëve? Ju nuk e zotëroni Golanin për t'ua dhënë atyre, por e zotëroni New Jersey-n".

 

Al-Sharaa vizitoi Shtëpinë e Bardhë në nëntor të vitit të kaluar, në vizitën e parë të një presidenti sirian që nga pavarësia e vendit në vitin 1946. Ai ishte takuar më parë me Trumpin në Riad në maj 2025, pak para se Washingtoni të hiqte sanksionet e Caesar-it.


Eric Wendt nis zyrtarisht misionin në Shqipëri, i dorëzon letrat kredenciale Presidentit Begaj

Pas gati tre vitesh, Ambasada e Shteteve të Bashkuara në Tiranë ka sërish një ambasador. Eric Wendt ka nisur këtë të shtunë zyrtarisht misionin e tij diplomatik në Shqipëri, duke pasuar Yuri Kim, e cila përfundoi mandatin në qershor të vitit 2023.

 

Wendt i dorëzoi letrat kredenciale Presidentit Bajram Begaj në Pallatin e Brigadave. Pas ceremonisë, ambasadori amerikan dhe kreu i shtetit zhvilluan një takim kokë më kokë. Wendt qëndroi rreth dy orë në ambientet e Pallatit të Brigadave.

 

Gjatë periudhës nga largimi i Yuri Kim deri në mbërritjen e ambasadorit të ri, përfaqësia diplomatike amerikane në Tiranë është drejtuar nga Nancy VanHorn, në cilësinë e së ngarkuarës me punë.

 

Eric Wendt u propozua nga Presidenti Donald Trump dhe u konfirmua nga Senati amerikan më 6 gusht. Ai vjen në Shqipëri me një karrierë të gjatë në fushën ushtarake dhe të sigurisë, me mbi 34 vite shërbim në ushtrinë amerikane, kryesisht në Forcat Speciale “Green Berets”. Wendt ka drejtuar gjithashtu Komandën e Operacioneve Speciale të NATO-s.

 

Gjatë dëgjesës së tij në Senat, Wendt përcaktoi si prioritete të mandatit në Shqipëri luftën kundër korrupsionit, krimit të organizuar dhe trafikut të drogës, forcimin e bashkëpunimit në fushën e mbrojtjes dhe sigurisë kibernetike, si dhe nxitjen e marrëdhënieve ekonomike.

 

Ambasadori i ri amerikan ka shprehur gjithashtu mbështetje për SPAK-un dhe bashkëpunimin e tij me agjencitë amerikane të zbatimit të ligjit, duke theksuar rëndësinë e ruajtjes së pavarësisë së institucionit.

 

Më 2 tetor, Wendt pritet të zhvillojë pritjen zyrtare, ku do të ftohen përfaqësues të politikës shqiptare nga të gjitha krahët.


Trump pret Xi në Shtëpinë e Bardhë: Nis pazari i madh SHBA-Kinë për tregtinë, AI dhe Tajvanin

 

Presidenti kinez Xi Jinping ndodhet në Uashington për vizitën e tij të parë shtetërore në Shtetet e Bashkuara pas më shumë se një dekade, ndërsa sot, 24 shtator, zhvillohet pjesa kryesore politike e vizitës. Xi mbërriti mbrëmjen e së mërkurës në Joint Base Andrews, ku Donald Trump ndërmori hapin e pazakontë për një president amerikan duke e pritur personalisht në aeroport. Pritja përfshiu tapetin e kuq, nderimet ushtarake dhe fluturime ushtarake, duke i dhënë vizitës një peshë të fortë simbolike.

Read more ...


Turqia nxjerr flotën në det: 100 anije dhe 14 mijë ushtarakë në mes tensioneve me Greqinë

 

Turqia nisi të dielën stërvitjen e gjerë detare Denizkurdu-I/2026 (“Ujku i Detit”), në një moment kur retorika mes Ankarasë dhe Athinës është ashpërsuar sërish. Sipas Ministrisë turke të Mbrojtjes, stërvitja do të zgjasë deri më 25 shtator dhe zhvillohet njëkohësisht në Detin e Zi, Marmara, Egje dhe Mesdheun Lindor, me pjesëmarrjen e rreth 100 anijeve, 50 avionëve dhe 14 mijë ushtarakëve.

Read more ...

XS
SM
MD
LG