Lidhje


Botërori i minifutbollit/ Shqipëria mes 16 më të mirave të botës, Irtan Sejko udhëheq kuqezinjtë drejt fazës së 1/8-ave

Shqipëria ka siguruar një vend mes 16 skuadrave më të mira të Botërorit të minifutbollit, duke kaluar në fazën e 1/8-ave të turneut që po zhvillohet në Essen të Gjermanisë.

Kuqezinjtë, të drejtuar nga Irtan Sejko, zhvilluan një aventurë pozitive në këtë kompeticion, duke arritur deri në fazën e eliminimit direkt dhe duke u renditur mes më të mirëve të botës.

 

Në fazën e 1/8-ave, Shqipëria u përball me Brazilin, në një ndeshje që përfundoi me fitoren 7-2 të brazilianëve. Ky rezultat i dha fund rrugëtimit të kuqezinjve në Botëror, por jo vlerës së arritjes së tyre për të qenë pjesë e 16 skuadrave më të mira.

Ndeshja Brazil-Shqipëri u shoqërua me tension të madh, sidomos në fund të saj. Pas përfundimit të takimit pati një përleshje mes lojtarëve të dy skuadrave, ndërsa në fushë u hodhën edhe sende nga tifozët shqiptarë.

 

Forcat e sigurisë ndërhynë për të rikthyer qetësinë, ndërsa Shqipëria e mbylli aventurën e saj në Botëror mes 16 më të mirave.

Për skuadrën e drejtuar nga Irtan Sejko, kalimi në fazën e 1/8-ave përbën një rezultat të rëndësishëm dhe një paraqitje pozitive në skenën botërore të minifutbollit.


Le Monde godet Ramën: Kulla, resorte dhe “star-arkitektë” në shërbim të pushtetit

 

Gazeta franceze Le Monde i ka kushtuar një analizë të gjerë modelit të zhvillimit urban dhe turistik në Shqipëri, duke e vendosur kryeministrin Edi Rama në qendër të një sistemi ku arkitektura dhe emrat e mëdhenj ndërkombëtarë përdoren, sipas gazetës, si pjesë e një strategjie për të projektuar jashtë vendit imazhin e një Shqipërie moderne, dinamike dhe tërheqëse për investitorët. Shkrimi thekson se Rama ka ndërtuar prej vitesh një marrëdhënie të drejtpërdrejtë me arkitektë të njohur botërorë, të cilëve u janë besuar projekte të mëdha në Tiranë dhe në zonat bregdetare.

 

Sipas Le Monde, pas kësaj fasade modernizuese qëndron një debat gjithnjë e më i ashpër mbi mënyrën se si po transformohen qytetet dhe bregdeti shqiptar. Gazeta përshkruan një model zhvillimi të karakterizuar nga projekte të mëdha, kulla, resorte dhe ndërhyrje urbane të konsideruara nga kritikët si ekstravagante dhe të realizuara me kontroll të pamjaftueshëm urbanistik, mjedisor dhe social. Në këtë lexim, arkitektura nuk paraqitet vetëm si çështje estetike, por si instrument politik dhe ekonomik, përmes të cilit krijohet një narrativë modernizimi ndërsa fitimet, sipas kritikëve të cituar, përqendrohen te një numër i kufizuar investitorësh dhe grupesh të privilegjuara.

 

Në qendër të artikullit është edhe vala e protestave që shpërtheu pas kundërshtimeve ndaj projekteve turistike në Zvërnec dhe Sazan, të lidhura me investimin miliarda dollarësh të kompanisë së Jared Kushner. Le Monde e lidh mobilizimin qytetar me shqetësimet për kufizimin e aksesit publik në bregdet, ndikimin mbi biodiversitetin, mungesën e transparencës dhe mënyrën se si miratohen projektet e mëdha turistike. Sipas gazetës, përplasja në Zvërnec u kthye në pikënisjen e një revolte më të gjerë politike, e cila më pas u zhvendos në Tiranë dhe u shoqërua me kërkesa që shkuan përtej çështjeve të urbanistikës, deri te reforma kushtetuese dhe zgjedhore dhe dorëheqja e kryeministrit.

 

Një vend të veçantë në analizë zë roli i të ashtuquajturve “star-arkitektë”, të cilët prej vitesh janë ftuar në Shqipëri nga Rama për projekte të mëdha publike dhe private. Gazeta sjell edhe protestën e qindra arkitektëve, artistëve dhe ambientalistëve shqiptarë, të cilët u kanë kërkuar emrave të njohur ndërkombëtarë që të mos bëhen pjesë e asaj që ata e konsiderojnë një “zbukurim” të një modeli zhvillimi që dëmton interesin publik. Në këtë kontekst, arkitektura është kthyer në simbolin e një përplasjeje më të madhe mes zhvillimit ekonomik të promovuar nga qeveria dhe akuzave se ky zhvillim po favorizon interesa të mëdha private.

 

Le Monde nënvizon gjithashtu se fama ndërkombëtare e arkitektëve është përdorur nga Rama si argument për cilësinë dhe seriozitetin e projekteve. Kryeministri, nga ana e tij, ka hedhur poshtë akuzat për mungesë transparence dhe ka mohuar se projektet po cenojnë interesin publik apo mjedisin, duke i cilësuar disa prej kritikave si dezinformim. Megjithatë, gazeta franceze vëren se protestat dhe reagimi i komunitetit profesional shqiptar kanë filluar ta vënë nën presion narrativën e deritanishme të qeverisë, duke e kthyer arkitekturën nga vitrinë e modernizimit në një nga fushëbetejat kryesore politike të momentit.


Protestat në Divjakë vijojnë pa ndalim. Qytetarët e revoltuar: Nuk fshihemi nga harta!

Banorët e Divjakës kanë mbushur sërish rrugët në ditën e 37-të të protestës së pandërprerë kundër projektit të mazhorancës për reformën e re administrative-territoriale, e cila parashikon shkrirjen e Bashkisë Divjakë. Përmes kësaj rezistence të gjatë, komuniteti lokal po kërkon me ngulm anulimin e këtij plani që zhvesh zonën nga përfaqësimi dhe shërbimet publike.

 

Gjatë fjalimeve të mbajtura në shesh, qëndrestarët kërkuan llogari të drejtpërdrejtë nga deputetët e zonës dhe kryeministri, duke theksuar se Divjaka nuk meriton të mbetet pa institucione vendore. Banorët nënvizuan se goditja e autonomisë vendore të një bashkie me kontribut të madh bujqësor e turistik dëmton drejtpërdrejt ekonominë e familjeve dhe të ardhmen e zonës.

 

Në përmbyllje të ditës së 37-të të rezistencës, protestuesit nuk janë mjaftuar me fjalimet në shesh, por kanë ndërmarrë një marshim masiv përgjatë rrugëve kryesore të Divjakës. Me thirrje të panumërta kundër vendimeve unilaterale të pushtetit qendror, banorët paralajmëruan se aksioni i tyre popullor do të vijojë pa ndërprerje deri në mbrojtjen e plotë të statusit administrativ të qytetit.


Veliaj çon çështjen në Strasburg, më 14 shtator Gjykata e Lartë shqyrton rekursin për arrestin

Më 10 shtator avokatët e huaj të Erion Veliajt do të dorëzojnë çështjen në Gjykatën e Strasburgut.

 

Lajmi u bë me dije nga avokatët e kryebashkiakut të Tiranës, i cili mbahet në paraburgim për 13 akuza penale.

 

Ndërkohë, më 14 shtator, Gjykata e Lartë do të shqyrtojë rekursin e Veliajt kundër masës së arrestit. Këto zhvillime ndodhin ndërkohë që Veliaj, nga burgu, po shkarkon zyrtarët e Bashkisë dhe po emëron të besuarit e tij.

XS
SM
MD
LG