Lidhje


Çaktivizimi i llogarive në rrjetet sociale, Rama reagon sërish ndaj EDP-së: Aludimi i juaj, i paturpshëm

Kryeministri Edi Rama ka reaguar sërish në lidhje me akuzën se qeveria ka mbyllur apo kufizuar 200 faqe në rrjetet sociale të personave të lidhur me protestën.

Duke reaguar ndaj një postimi të Partisë Demokratike Evropiane (Democrats European Democratic Party” ku sipas tyre në Shqipëri janë mbyllur qindra llogari në rrjetet sociale , Rama i konsideron aludimet të paturpshme.

 

 

“Jo, kjo është një tjetër pikë e ulët. Ajo që e urreva ishte aludimi i juaj i paturpshëm vizual, dhe fakti që refuzoni ta trajtoni këtë tregon saktësisht se çfarë lloj demokratësh jeni. Më vjen keq!”, shprehet Rama në rrjetin “X”.

Eksperti i medieve sociale Blerim Gjeladini ka reaguar ditën e djeshme lidhur me pretendimet se qeveria shqiptare ka mbyllur disa llogari në Instagram, duke theksuar se asnjë shtet nuk ka mundësi të ndërhyjë drejtpërdrejt në sistemet e platformës për të mbyllur llogari të caktuara.

Në një reagim të publikuar në rrjetet sociale, Gjeladini shprehet se është e gabuar të thuhet se qeveria ka mbyllur llogari në Instagram, por edhe se shteti shqiptar nuk ka kapacitet ta bëjë një gjë të tillë, pasi sipas tij, një mundësi e tillë nuk i jepet asnjë qeverie.

 

 

Ai shpjegon se një qeveri mund të tentojë të bllokojë një platformë të tërë në territorin e saj, por nuk mund të hyjë në Instagram dhe të vendosë se cilat llogari do të mbyllen.

Sipas Gjeladinit, mbyllja e llogarive mund të lidhet me shkelje të politikave të platformës, përfshirë aktivitetin e koordinuar joautentik (CIB), përdorimin e profileve false, bot-eve apo metodave artificiale për rritjen e reagimeve, shikueshmërisë dhe ndikimit. Ai përmend gjithashtu shkeljet e të drejtave të autorit, privatësisë dhe rregullave të tjera të platformës.

Gjeladini thekson se, me zhvillimin e inteligjencës artificiale, këto aktivitete mund të identifikohen më shpejt nga platformat.

 

 

“Po të kishte një qeveri mundësi të hynte direkt në sistemet e Instagramit dhe të mbyllte llogari me sustë, kjo do të ishte skandal botëror, çështje sigurie globale dhe çështje besimi te platforma”, shprehet ai.

Reagimin e plotë të ekspertit e ka publikuar në rrjetet sociale edhe kryeministri Edi Rama, bashkë me foton e tretë të postimit të Gjeladinit, ku shfaqet një fotografi e kryeministrit Edi Rama, e shoqëruar me diçiturën: “Edi Rama është vetëm patronazhisti më i gjatë” duke e shoqëruar me një koment ironik: “Tani le ta bëjnë edhe këtë patronazhist”.


Fund imunitetit për ministrat, Mali i Zi rrëzon mburojën politike për korrupsionin

Parlamenti miratoi me 66 vota pro dhe asnjë kundër propozimin për ndryshimin e Kushtetutës. Reforma synon t’u heqë presidentit dhe anëtarëve të qeverisë mbrojtjen nga përgjegjësia penale për veprat që lidhen me ushtrimin e detyrës, ndërsa Podgorica përgatit edhe kontrollin paraprak të integritetit për kandidatët për poste qeveritare.

Mali i Zi ka ndërmarrë një hap të rëndësishëm në luftën kundër korrupsionit, duke nisur procedurën kushtetuese për heqjen e imunitetit të anëtarëve të qeverisë për veprat penale që lidhen me detyrën zyrtare. Parlamenti malazez miratoi të enjten propozimin për ndryshimin e Kushtetutës, duke synuar që posti i ministrit të mos mund të shërbejë si mbrojtje nga përgjegjësia penale në rastet e korrupsionit.

Read more ...


ShBA: Miratohet projektligji për ndëshkimin e universiteteve për bojkotim ndaj Izraelit

Dhoma e Përfaqësuesve e ShBA-së miratoi një projektligj të mbështetur nga republikanët, i cili parashikon ndëshkimin e universiteteve që marrin pjesë në bojkotet ndaj Izraelit ose që kufizojnë studentët nga pjesëmarrja në programet e shkëmbimit me atë vend.

Ligji për Mbrojtjen e Lirisë Ekonomike dhe Akademike u miratua me 237 vota pro dhe 169 kundër, ndërsa 33 demokratë votuan në favor të tij së bashku me republikanët dhe dy republikanë kundërshtuan legjislacionin. Projektligji tani i kalon Senatit.

 

 

Sipas projektligjit, kolegjet dhe universitetet që marrin pjesë në programet federale të ndihmës studentore do të ndalohen të marrin pjesë në bojkotet ndaj Izraelit.

Institucionet që marrin fonde federale për programet e studimeve ndërkombëtare dhe gjuhëve të huaja do të duhet gjithashtu të certifikojnë çdo vit se nuk kufizojnë studentët nga pjesëmarrja në programe në Izrael ose studentët izraelitë nga pjesëmarrja në programet në kampuset e tyre.

"Kalbëzimi antisemitik që ka gërryer kampuset universitare duhet të çrrënjoset", tha kongresmenia republikane Virginia Foxx nga shteti i Karolinës së Veriut, duke shtuar: "Sot, Dhoma e Përfaqësuesve dërgoi një mesazh të qartë: nëse një institucion i arsimit të lartë zgjedh t'i nënshtrohet lëvizjes gërryese BDS (Bojkot, Çinvestim dhe Sanksione), do të ketë pasoja, duke filluar me këtë legjislacion dypartiak".

 

 

Demokrati Josh Gottheimer nga Nju Xhersi, i cili bashkë-sponsorizoi projektligjin me Foxx, tha se ai ishte i nevojshëm për të luftuar antisemitizmin.

"Asnjë student, asnjë profesor nuk duhet të përjashtohet nga kërkimi shkencor, mundësitë për studime jashtë vendit ose partneritetet akademike, apo të ndihet i padëshiruar në klasë për shkak të vendit nga vjen ose fesë që praktikon. Megjithatë, pikërisht këtë synon të bëjë lëvizja e bojkotit, çinvestimit dhe sanksioneve, duke shënjestruar një vend dhe një fe: Izraelin dhe judaizmin", tha ai.

 

 

"Projektligji im dypartiak me kongresmenen Foxx është i kufizuar dhe i përcaktuar - nuk prek të drejtën e askujt për të shprehur mendimin, protestuar apo zhvilluar debat akademik. Ai thjesht thotë se nëse universiteti juaj merr para nga taksapaguesit federalë, ai nuk mund të diskriminojë ndaj partneriteteve akademike ose investimeve me një vend", shtoi ai.

 


Kryeministri Kurti flet për gazetarin francez: Nuk duam një Republikë Srpska të re në Kosovë

Kryeministri i Kosovës në detyrë, Albin Kurti, ka kundërshtuar sërish formimin e Asociacionit të Komunave me shumicë serbe në formën që kërkohet nga Beogradi, duke paralajmëruar se një strukturë e tillë mund të cenonte shtetësinë dhe funksionalitetin e Kosovës.

Në një intervistë për podcastin gjeopolitik “Quartier Général”, Kurti deklaroi se nuk është kundër bashkëpunimit ndërmjet komunave, por se një mekanizëm i tillë duhet të funksionojë brenda rendit kushtetues të Republikës së Kosovës dhe të synojë përmirësimin e shërbimeve publike.

 

 

“Ne tashmë e kemi një asociacion të komunave. Por ajo që Serbia e quan asociacion, në të vërtetë nuk është për komunitetin serb, por kundër pavarësisë së Kosovës”, tha Kurti.

Sipas tij, Prishtina synon marrëdhënie të mira fqinjësore dhe normalizim të plotë me Serbinë, por në kuadër të një procesi që përfshin edhe njohjen reciproke.

Çështja e Asociacionit është një nga pikat kryesore të Marrëveshjes së Brukselit të vitit 2013. Formimi i saj është kërkuar vazhdimisht nga Beogradi, ndërsa Prishtina ka refuzuar një asociacion me kompetenca ekzekutive.

 

 

Kurti iu referua edhe vendimit të Gjykatës Kushtetuese të Kosovës, e cila në vitin 2015 konstatoi se parimet e atëhershme për Asociacionin nuk ishin plotësisht në përputhje me Kushtetutën.

Kryeministri në detyrë argumentoi se problemi, sipas tij, nuk qëndron te komuniteti serb në Kosovë, por te politika e Beogradit, të cilën e akuzoi për një “nxitje hegjemoniste” dhe për mospranimin e faktit që serbët mund të jenë pakicë në shtete të tjera.

Prishtina ka paralajmëruar prej vitesh se nuk do të pranojë një strukturë që do të mund të merrte kompetenca të ngjashme me ato të Republikës Srpska në Bosnje e Hercegovinë, duke e konsideruar këtë si rrezik për funksionimin e institucioneve dhe shtetësinë e Kosovës.

 

 

Në anën tjetër, Beogradi e konsideron krijimin e Asociacionit një nga detyrimet kryesore të Prishtinës që rrjedhin nga dialogu i ndërmjetësuar nga Bashkimi Evropian.

Çështja vazhdon të mbetet një nga pengesat më të mëdha në procesin e normalizimit të marrëdhënieve Kosovë–Serbi. 


Artileria izraelite shënjestron periferinë perëndimore të Damaskut

Media shtetërore e Sirisë raportoi se “forcat pushtuese izraelite kanë hedhur katër predha drejt zonës përreth kodrës Bat al-Warda, pranë qytezës Beit Jinn, në periferinë perëndimore të Damaskut”.

Forcat izraelite të enjten kanë hedhur katër predha në zonën përreth kodrës Bat al-Warda, pranë Beit Jinnit, në periferinë perëndimore të Damaskut, raportoi media shtetërore siriane.

 

 

Televizioni Alikhbaria raportoi se “forcat pushtuese izraelite kanë hedhur katër predha drejt zonës përreth kodrës Bat al-Warda, pranë qytezës Beit Jinn, në periferinë perëndimore të Damaskut”.

Nuk ka pasur raportime të menjëhershme për viktima ose dëme materiale nga bombardimet, ndërsa autoritetet siriane nuk kanë bërë deklaratë lidhur me incidentin.

Kodra Bat al-Warda ishte shënjestruar në mënyrë të ngjashme të shtunën, disa ditë pasi një delegacion sirian i kryesuar nga ministri i Jashtëm Asaad al-Shaibani u takua me një delegacion izraelit në Jordani, nën ndërmjetësimin e ShBA-së, sipas agjencisë zyrtare siriane të lajmeve, SANA, e cila citoi një burim diplomatik në Ministrinë e Jashtme.

 

 

Burimi tha se takimi u zhvillua “si pjesë e përpjekjeve për uljen e tensioneve pas bombardimeve të fundit izraelite në territorin sirian dhe përshkallëzimit të tensioneve në jug të Sirisë”.

Pjesë të jugut të Sirisë kanë përjetuar inkursione dhe sulme pothuajse të përditshme izraelite, veçanërisht në provincat Kuneitra dhe Dara, përfshirë bastisje, kontrolle, arrestime dhe ngritjen e pikave të kontrollit ushtarak.

 

 

Izraeli ka pushtuar pjesën më të madhe të Lartësive të Golanit që nga viti 1967. Pas rënies së regjimit të Bashar al-Asadit më 8 dhjetor 2024, Izraeli e shpalli të pavlefshme marrëveshjen e vitit 1974 për ndarjen e forcave dhe pushtoi zonën tampon siriane dhe pozicione të tjera, përfshirë anën siriane të malit Hermon.

Më 26 korrik, presidenti sirian Ahmad al-Sharaa tha se qeveria e tij po punon me disa vende për të arritur një marrëveshje sigurie me Izraelin, duke shtuar se një marrëveshje e suksesshme “do t’i hapë rrugën paqes gjithëpërfshirëse, pa hequr dorë nga e drejta e Sirisë mbi Lartësitë e pushtuara të Golanit”.

XS
SM
MD
LG