Lidhje


Mars-korrik/ Shqiptarët shpenzuan 80 milionë euro më shumë për të blerë naftë, për konsum të njëjtë

Në teori, kur çmimi i karburantit rritet, drejtuesit e mjeteve priren të kufizojnë përdorimin e makinës. Në Shqipëri, kjo lidhje duket shumë më e dobët. Mungesa e alternativave të zhvilluara të transportit publik, sidomos jashtë Tiranës dhe për lëvizjet ndërqytetëse, teksa Shqipëria është vendi i vetëm në Europë pa trena, e bën përdorimin e automjetit një nevojë që vështirë se mund të reduktohet edhe kur çmimi i naftës rritet fort.

 

 

Të dhënat e importeve për periudhën mars-korrik 2026 e tregojnë këtë qartë. Në pesë muaj u importuan rreth 305.8 mijë tonë karburante, vetëm 1.2% më pak se në të njëjtën periudhë të vitit të kaluar, kur sasia ishte rreth 309.6 mijë tonë.

Rënia e lehtë e importeve erdhi kryesisht nga prilli dhe maji, kur sasitë e futura në vend ishin përkatësisht 14.3% dhe 7.3% më të ulëta se një vit më parë. Në mars, importet u rritën me 2.8%, ndërsa tendenca ndryshoi ndjeshëm në verë.

Read more ...


Përplasjet gjatë protestës së djeshme para Kryeministrisë, arrestohen 14 persona

Protesta e 94-të kundër qeverisë u mbyll me tensione dhe përplasje fizike mes tubuesve dhe efektivëve të policisë para Kryeministrisë. Sipas policisë, 14 persona u arrestuan në flagrancë, ndërsa tre të tjerë u proceduan penalisht në gjendje të lirë. Incidentet nisën rreth orës 20:00, kur një grup protestuesish u zhvendos në rrugën “Ismail Qemali”, në anën jugore të Kryeministrisë. Sipas policisë, ata bllokuan hyrje-daljet e godinës, ndërsa brenda ndodheshin personalitete të larta shtetërore.

 

 

Forcat e rendit krijuan një kordon sigurie për të penguar depërtimin e mëtejshëm të protestuesve. Tubuesit qëndruan për rreth 30 minuta pranë hyrjes së Kryeministrisë, pavarësisht thirrjeve të policisë për lirimin e rrugës dhe shpërndarjen.

 

 

Situata degradoi edhe në përplasje fizike. Sipas autoriteteve, protestuesit kundërshtuan me forcë efektivët, ndërsa gjatë incidenteve mbeti i lënduar edhe një punonjës policie. Të arrestuarit janë Dritan Goxhaj, Junik Matoshi, Edison Lika, Erlind Almeta, Sokol Bushi, Lulzim Gjini, Valtion Shameti, Florian Manarkolli, Desiderjo Alimucaj, Bora Mitrovica, Arvina Lleshi, Ylli Brahaj, Arben Kola dhe Aumiraldi Dalliu.


Del jashtë kontrollit zjarri në Ulëz të Matit, përparon me shpejtësi. Evakuohen disa familje

Prej katër ditësh, situata nga zjarri në Njësinë Administrative Ulëz, në Bashkinë Mat, vijon të jetë kritike. Flakët kanë përfshirë qindra hektarë pyje me pisha, dushqe dhe bimësi të tjera, duke u përhapur në zonat e Lundres, Trodhenes dhe Madheshit.

 

 

Zjarri ka dalë jashtë kontrollit dhe po përparon me shpejtësi, ndërsa tymi i dendur dhe flakët e bëjnë  të pamundur ndërhyrjen nga toka. Gjatë mbrëmjes së kaluar, për shkak të flakëve, janë evakuuar disa familje nga Madheshi. Zjarri ka rrezikuar edhe banesa dhe në stane me bagëti. Sot forca të shumta janë nisur drejt Madheshit për izolimin  vatrave te zjarrit. 

 

 

Në terren ndodhen punonjës të Bashkisë Mat, zjarrfikës, shërbimi pyjor dhe forca të ushtrisë, të cilët prej katër ditësh po përpiqen për izolimin e flakëve. Për shuarjen e zjarrit është përdorur edhe një helikopter, i cili prej tre ditësh punon për shuarjen e flakëve.


Veliaj bllokon pagat e Bashkisë së Tiranës, punonjësit ngelen “thatë”

Një situatë e pazakontë është krijuar në Bashkinë e Tiranës, ku bllokimi i procedurave për pagesat e punonjësve ka ngritur shqetësime për funksionimin normal të institucionit.

Pas përplasjeve të fundit për drejtimin e bashkisë, procesi i firmosjes së pagave ka mbetur pezull, duke rrezikuar që punonjësit e administratës të përballen me vonesa në marrjen e pagave.

 
 

Kritikët e kësaj situate pretendojnë se bllokimi i funksionimit të bashkisë mund të jetë një mënyrë për të krijuar presion institucional dhe për të ndikuar në proceset që lidhen me të ardhmen e drejtimit të institucionit.

 

 

Ndërkohë, Erion Veliaj vijon të mbajë postin e kryebashkiakut, pavarësisht se ndodhet në paraburgim, ndërsa përplasjet ligjore dhe administrative për Bashkinë e Tiranës vazhdojnë.

Situata ka shkaktuar shqetësim te punonjësit dhe qytetarët, pasi çdo ngërç në funksionimin e bashkisë mund të ndikojë në shërbimet dhe administrimin e kryeqytetit.


Urgjenca pranon dështimin: Deda dhe Preka vdiqën sepse ambulanca kishte defekt

Pas protestës së banorëve të Vaut të Dejës për vonesën e ambulancës në ngjarjen tragjike ku humbën jetën David Deda dhe Sokol Preka, Qendra Kombëtare e Urgjencës Mjekësore ka pranuar se ambulanca e zonës ishte jashtë funksionit për shkak të një defekti teknik. Sipas Qendrës Kombëtare të Urgjencës Mjekësore, telefonata e parë është regjistruar në orën 18:03, ndërsa ambulanca e nisur nga Shkodra ka mbërritur në orën 19:44, pra rreth 1 orë e 41 minuta më vonë. Institucioni argumenton se viktima ishte në arrest kardiak dhe se, pavarësisht reanimimit, nuk u arrit rikthimi i qarkullimit spontan.

 
 

Sqarimi i Qendrës Kombëtare të Urgjencës Mjekësore ngre pikëpyetje të forta mbi mënyrën se si është menaxhuar shërbimi i urgjencës në një zonë ku ambulanca lokale rezultonte jashtë funksionit. Përballë kësaj situate, përgjegjësia politike bie edhe mbi Ministrinë e Shëndetësisë dhe ministren e Shëndetësisë Evis Sala, e cila duhet t’u japë përgjigje banorëve se përse një ambulancë e urgjencës nuk ishte në gatishmëri dhe pse alternativa e dërguar nga Shkodra kërkoi kaq shumë kohë për të mbërritur. Një defekt teknik nuk mund të mbyllë debatin mbi gatishmërinë e shërbimeve jetike dhe masat që ishin marrë për të garantuar mbulimin e zonës.

 

 

Ngjarja e 29 gushtit mbetet një tragjedi e rëndë, por pranimi i vonesës nga vetë Qendra Kombëtare e Urgjencës Mjekësore e bën edhe më të domosdoshëm një hetim të plotë mbi përgjegjësitë institucionale. Familjarët dhe banorët e Vaut të Dejës kërkojnë të dinë nëse një reagim më i shpejtë do të kishte ndryshuar fatin e viktimave, ndërsa Ministria e Shëndetësisë duhet të sqarojë publikisht se çfarë ndodhi me ambulancën lokale, sa kohë kishte jashtë funksionit dhe pse nuk u garantua menjëherë një mjet zëvendësues.

XS
SM
MD
LG