Lidhje


Jorida Tabaku: KAYO godet rrugën e Shqipërisë drejt BE-së

 

Deputetja e Partisë Demokratike, Jorida Tabaku, analizon pasojat që, sipas saj, ka afera KAYO në procesin e integrimit europian të Shqipërisë. Tabaku argumenton se procedurat e ndjekura në sektorin e mbrojtjes dhe në tenderat publikë cenojnë parimet e transparencës, konkurrencës dhe shtetit ligjor, të cilat janë në themel të negociatave me Bashkimin Europian.

Read more ...


Qeveria i jep 90 mijë m² për 1 Euro firmës së lidhur me PD dhe PS

Dhjetë vjet pas tërheqjes dramatike nga projekti prej 450 milionë eurosh në Gjirin e Lalëzit, shoqëria “Omnix Albania” rikthehet si investitore strategjike në Durrës. Kompania, e cila atëherë ishte në pronësi të administratorit libanez Fadi Mitri, u detyrua të tërhiqej pasi Mitri u dhunua barbarisht, pikërisht për ta penguar në realizimin e investimit.

 

Megjithatë, tanimë kompania është e gjitha shqiptare dhe duket se ka gjetur mbështetjen e politikës. Sipas të dhënave të bëra publike, katër kompanitë aksionere të “Omnix Albania” reflektojnë një “koalicion PD-PS”.

 

Struktura e pronësisë tregon se 50% e kapitalit të kompanisë zotërohet nga shoqëria “KLAR”, në pronësi të Shkëlqim Beshirit, një biznesmen i lidhur ngushtë me Shkëlzen Berishën, djalin e kreut të PD-së Sali Berisha.

 

Nga 17.5% e aksioneve zotërohen nga “Matrix Konstruksion” dhe “Blessed Investment”, kompani të lidhura me djemtë e ish-deputetes socialiste Valentina Leskaj. Pjesa tjetër prej 15% zotërohet nga “RDA Petrol” e Fation Veizajt, ish-deputet i Partisë Demokratike.

 

Përkundrejt tarifës simbolike prej 1 euroje, qeveria i ka dhënë kompanisë në përdorim 90.030 metra katrorë tokë shtetërore, për realizimin e një investimi po në turizëm. Vendimi parashikon vënien në dispozicion të tri pasurive të paluajtshme shtetërore, në Gjirin e Lalëzit, një zonë e lakmuar prej vitesh për investime.

 

Më herët, në korrik të vitit 2022, kompanisë iu dha statusi “Investim/Investitor Strategjik Procedurë e Veçantë” për projektin “Resort turistik me vendndodhje në Gjirin e Lalëzit”. Projekti parashikon një kompleks luksoz që përfshin një park rezidencial, një bulevard, një hotel me 5 yje, park ujor, klub fëmijësh, klub plazhi dhe do të shtrihet në një sipërfaqe prej më shumë se 237 mijë metra katrorë.

 

Vlera e investimit të projektit parashikohet të jetë rreth 216 milionë euro, ndërsa projekti do të ketë një shtrirje kohore prej 5 vitesh.


Turqi ka nisur operacion ndaj organizatave LGBTQ+: Dhjetëra të arrestuar

Autoritetet turke kanë arrestuar 26 persona dhe kanë kryer kontrolle në zyrat e gjashtë organizatave LGBTQ+ gjatë një serie operacionesh të zhvilluara pas akuzave për prostitucion dhe veprime të pahijshme.

 

Sipas Prokurorisë së Stambollit, operacionet janë zhvilluar në 12 provinca dhe kanë përfshirë 38 të dyshuar. Gjatë kontrolleve, autoritetet kanë sekuestruar drogë, pajisje elektronike, alkool të kontrabanduar dhe një armë zjarri.

 

Organizata LGBTQ+ Kaos GL ka deklaruar se të paktën 50 aktivistë janë ndaluar, përfshirë më shumë se 10 persona të arrestuar gjatë bastisjeve në banesat e tyre. Sipas organizatës, janë bllokuar gjithashtu dhjetëra faqe interneti dhe llogari në rrjetet sociale të lidhura me organizata dhe aktivistë LGBTQ+.

 

Operacioni, i koduar “Familja ime është e sigurt”, zhvillohet në kuadër të politikave të qeverisë turke për mbrojtjen e vlerave familjare dhe rritjen e natalitetit.

 

Ministri turk i Drejtësisë, Akin Gurlek, tha se hetimet përfshijnë gjithsej 162 persona të dyshuar, nëntë organizata dhe 13 biznese në 15 provinca.

 

Grupet e të drejtave të njeriut kanë akuzuar qeverinë turke për rritje të presionit ndaj komunitetit LGBTQ+.


“Qepeni gojën”/ Përplasje për shkrirjen e bashkisë në Poliçan, qytetarët braktisin takimin e Ramës

Takimi i Edi Ramës në Berat, i zhvilluar në kuadër të diskutimeve për Reformën Territoriale, është shoqëruar me debate mes kreut të qeverisë dhe përfaqësuesve të Poliçanit.

 

Sipas të dhënave, takimi ka nisur me një prezantim të bërë nga Ministri i Pushtetit Vendor, Ervin Demo. Pas përfundimit të fjalës së Demos, banorët e Poliçanit janë

 

ngritur për të diskutuar dhe për të ngritur shqetësimet e tyre, por janë përballur me reagimin e ashpër të Ramës, i cili u është drejtuar me frazën “Qepeni gojën”.

 

Kjo deklaratë ka nxitur irritimin e menjëhershëm të të pranishmëve, duke provokuar një debat të tensionuar verbal mes kryeministrit Rama, kryebashkiakut të Poliçanit Adriatik Zotkaj dhe aktores Egla Ceno.

 

Në shenjë proteste ndaj qasjes së kreut të qeverisë, e gjithë përfaqësia e ardhur nga Poliçani ka bojkotuar takimin dhe është larguar nga salla.


“Festivali i Fëmijëve” apo predikim ungjillor? Pyetjet që ngre aktiviteti para Bashkisë Shkodër…

Nga Shkelqim Malevija

 

A është e moralshme kjo mënyrë?

Sot, para Bashkisë Shkodër, qytetarët dhe sidomos familjet me fëmijë u ftuan në atë që u reklamua si “Festivali i Fëmijëve” dhe “Shpresa Fest – një vend për të gjithë familjen”

 

Muzikë, klounë, argëtim, shorte dhe dhurata: biçikleta, telefona, PlayStation, MacBook, Smart TV… Por në broshurat e shpërndara nuk evidentohet organizatori dhe as karakteri fetar/misionar i aktivitetit.

 

Pasi njerëzit u mblodhën, nisi muzika dhe u shpërndanë dhuratat e para, aktiviteti kaloi në dramë dhe predikim ungjillor për Jezu Krishtin, nga përfaqësues të Global Ventures.

Të jemi të qartë: është e drejta e secilit të besojë, të ushtrojë dhe të predikojë fenë e vet. E respektojmë plotësisht këtë të drejtë.

 

Por pse të mos thuhet troç dhe shkoqur që në ftesë?

Nëse organizatori është Global Ventures, pse nuk shkruhet? Nëse aktiviteti përmban predikim ungjillor, pse nuk thuhet? Pse të tërhiqen fëmijë e familje me dhurata dhe argëtim, pa u treguar qartë se çfarë aktiviteti do të zhvillohet?

 

Akoma më problematik është fakti që gjithçka zhvillohet në sheshin para Bashkisë, duke krijuar natyrshëm përshtypjen e një aktiviteti të organizuar ose të mbështetur prej saj. Posterët kanë qenë publikisht të ekspozuar edhe në qendër të qytetit dhe lehtësisht të kontrollueshëm nga institucionet.

 

Respektojmë çdo fe dhe çdo besim. Por respekt kërkojmë edhe për qytetarët. Mos na ftoni për një gjë dhe, pasi të mblidhen fëmijët e familjet, të na servirni një tjetër.

Dhe në fund, kjo situatë ngre edhe një pyetje tjetër: a ka lidhje ky aktivitet me faktin që Festa e Birrës, e zhvilluar prej vitesh para Bashkisë, këtë vit u spostua në sheshin në krah të Xhamisë Ebu Beker?

 

Bashkia Shkodër duhet të sqarojë kush e kërkoi sheshin, kur e kërkoi, çfarë aktiviteti deklaroi dhe çfarë aktiviteti autorizoi Bashkia.

Liria e besimit është e shenjtë. Por edhe transparenca dhe respekti ndaj qytetarëve janë të panegociueshme.

XS
SM
MD
LG