Lidhje


Kroacia reagon pas dënimit të Thaçit: Vendimi nuk ndryshon kontekstin e luftës në Kosovë, Tirana ende hesht

Ministria e Jashtme e Kroacisë ka reaguar pas aktgjykimit të dhënë në Hagë ndaj ish-presidentit të Kosovës, Hashim Thaçi, dhe ish-krerëve të tjerë të UÇK-së, ndërsa Ministria e Jashtme e Shqipërisë, e drejtuar nga Ferit Hoxha, ende nuk ka dalë me një qëndrim zyrtar.

 

Sipas raportimeve në mediat kroate, Ministria e Punëve të Jashtme dhe Europiane e Kroacisë ka deklaruar se “e merr në dijeni” vendimin e shkallës së parë të Dhomave të Specializuara të Kosovës ndaj Thaçit, duke theksuar se bëhet fjalë për një vendim ende jo të formës së prerë.

 

Në reagim, Zagrebi nënvizon se ky aktgjykim “nuk e ndryshon kontekstin e luftës”, një formulim që ndan qartë procesin penal individual nga interpretimi politik dhe historik i luftës së Kosovës.

 

Në këtë pikë bie në sy heshtja e Tiranës zyrtare. Deri tani, ministri i Jashtëm i Shqipërisë, Ferit Hoxha, nuk ka reaguar publikisht për vendimin ndaj ish-krerëve të UÇK-së, ndërsa homologu i tij kroat ka zgjedhur të mbajë një qëndrim të qartë institucional: vendimi merret në dijeni, por nuk rishkruan kontekstin e luftës së Kosovës.

 

Gjykata Speciale në Hagë dënoi sot Hashim Thaçin me 25 vite burg për krime lufte, përfshirë vrasje, torturë, trajtim mizor dhe ndalim arbitrar. Në të njëjtën çështje janë dënuar edhe Kadri Veseli, Rexhep Selimi dhe Jakup Krasniqi. Të pandehurit kanë mohuar akuzat dhe vendimi mund të apelohet.

 

Reagimi i Kroacisë vjen në një moment kur aktgjykimi ka shkaktuar reagime të forta në Kosovë, ku shumë e shohin procesin si goditje ndaj figurave kryesore të luftës, ndërsa gjykata ka këmbëngulur se çështja lidhet me përgjegjësi individuale dhe jo me legjitimitetin e UÇK-së.


Arrestohet Eno Agasi, dyshohet se vodhi verën miliona euro nga kantina e kushëririt Ergys Agasi

 

Policia ka vënë në pranga ditën e sotme shtetasin Eno Agasi, i cili ishte shpallur në kërkim nga Prokuroria e Tiranës për zhdukjen e një sasie të madhe vere me vlerë miliona euro nga një kantinë private.

 

Sipas të dhënave nga grupi hetimor, ngjarja ka ndodhur menjëherë pas përfundimit të procedurave të inventarizimit zyrtar. Malli i bllokuar u lëshua përkohësisht në ruajtje brenda ambienteve të kantinës për shkak se transporti doganor nuk mund të realizohej gjatë orëve të natës. Megjithatë, gjatë kontrollit të ushtruar të nesërmen nga autoritetet, e gjithë sasia e verës rezultoi e larguar nga magazina.

 

I arrestuari ngarkohet me përgjegjësi penale për veprat "Kontrabandë me mallra që paguajnë akcizë", "Magazinim i mallrave që paguajnë akcizë" si dhe "Veprime që pengojnë zbardhjen e të vërtetës". Përveç përvetësimit të mallit, ai dyshohet se ka ndërhyrë drejtpërdrejt në pajisjet e sigurisë duke fshirë pamjet filmike të kamerave të ambientit.

 

Kjo goditje procedurale vjen në vijim të hetimit të zgjeruar që çoi më parë në ndalimin e Ergys Agasit në zonën e Durrësit, i cili ndodhet nën hetim nga struktura të posaçme për përfshirje në procedurat e tenderimeve publike dhe korrupsion.


Mediat serbe nisin ‘festën’ pas vendimit për ish-krerët e UÇK-së: Fajtorët u dënuan!

Mediat serbe i kanë kushtuar vëmendje të gjerë aktgjykimit ndaj Hashim Thaçit, Kadri Veselit, Jakup Krasniqit dhe Rexhep Selimit në Hagë.

 

Në titujt e tyre bie në sy përdorimi i një gjuhe të fortë dhe, në disa raste, cilësime të drejtpërdrejta për UÇK-në dhe ish-krerët e saj. Aktgjykimi i sotëm i shkallës së parë i dënoi të katër për krime lufte, ndërsa akuzat për krime kundër njerëzimit nuk u provuan sipas standardit të kërkuar nga gjykata.

 

B92 e hap raportimin me titullin:

“Reshje aktgjykimesh: Thaçi – fajtor; Veseli – fajtor; Krasniqi – fajtor; Selimi – fajtor; udhëheqësve të UÇK-së 25 vjet burg.”

 

Media thekson se Hashim Thaçi është dënuar me 25 vjet burgim, ndërsa Kadri Veseli me 18 vjet, Jakup Krasniqi me 25 vjet dhe Rexhep Selimi me 13 vjet.

Kurir përdor një titull dukshëm më të ashpër:

 

“Aktgjykimi ndaj udhëheqësve të UÇK-së kriminale, të katër fajtorë për krime lufte: Hashim Thaçit dhe Jakup Krasniqit nga 25 vjet burg! Veselit 18, Selimit 13!”

 

Në tekst, Kurir përsërit se të katër janë shpallur fajtorë për krime lufte dhe jep dënimet përkatëse: Thaçi 25 vjet, Krasniqi 25, Veseli 18 dhe Selimi 13 vjet burgim. Media serbe veçon gjithashtu pretendimin e aktakuzës se krimet kanë prekur rreth 407 të ndaluar, prej të cilëve të paktën 102 janë vrarë.

 

Blic e vendos në qendër të titullit dënimet:

“Hashim Thaçi dhe Krasniqi dënohen me 25 vjet burg, Veseli me 18! Haga shpalli aktgjykimet ndaj udhëheqësve të UÇK-së.”

 

Në raportim thuhet se Thaçi, Krasniqi, Veseli dhe Selimi janë dënuar në Hagë, duke veçuar veçanërisht dënimin 25-vjeçar të Thaçit. Blic përmend gjithashtu atmosferën rreth gjykatës në Hagë: përkrahësit e të akuzuarve kishin qëndruar gjatë natës pranë gjykatës me flamuj dhe pankarta të UÇK-së, ndërsa policia kishte shtuar masat e sigurisë. Media i referohet gjithashtu interesimit të madh të gazetarëve për procesin.

 

Hashim Thaçi dhe tre ish-drejtuesit e tjerë të UÇK-së janë gjykuar në Hagë për akuza që përfshijnë përndjekje, torturë, vrasje dhe zhdukje të detyruara gjatë dhe pas luftës në Kosovë. Çështja është veçanërisht e ndjeshme për shqiptarët e Kosovës, shumë prej të cilëve e konsiderojnë Thaçin dhe UÇK-në si simbole të rëndësishme të luftës për pavarësinë e Kosovës.

 


Myftiu Sytari: “Dita Botërore e Paqes, frymëzim për t’u ndarë nga haramet dhe zullumet!”

 

Elhamdulilah, unë jam musliman dhe bota është më e sigurt! Kjo është esenca dhe zanafilla!

Pas çdo namazi, ne si muslimanë lexojmë dhikret e virdeve ditore që na i mësoi Resulull-llahu (a.s), ku fjalia e parë pas istigfarit është: “All-llahumme Entes-Selamu ve minkes-Selam…”, që do të thotë: “Zoti im, Ti je burimi i Paqtimit, prej Teje buron Paqja…”

 

Me pak fjalë, më e pakta, pesë herë në ditë, Islami na edukon e na frymëzon drejt paqtimit dhe rrugëve të tij, duke u lartësuar ditë pas dite drejt asaj që Krijuesi ynë kërkon prej nesh në këtë jetë!

Le të punojmë me sa të kemi mundësi për të jetuar në paqe dhe harmoni me njëri-tjetrin, duke ruajtur mbi të gjitha dinjitetin dhe krenarinë e besimit dhe të fesë, shenjtërinë e jetës dhe atë të njeriut-mëkëmbës i Zotit në tokë, dijes dhe arsimimit!

 

Të përpiqemi për të punuar me pastërti e dinjitet, të angazhohemi për të ruajtur e mbrojtur Tokën, nënën tonë të përbashkët, nga zjarret dashakeqe, nga shkatërrimet egoiste, nga zaptimet zullumqare, nga mohimi i pronësisë për të zotët legjitimë, por jo vetëm, dhe që shpien drejt konflikteve dhe të papriturave të padëshiruara!

 

Të angazhohemi me të gjitha forcat për t’u ndarë nga politikat shkatërrimtare, që prishin rendin mbi tokë, edhe duke përdorur kartën e fesë për të përçarë njerëzit mbi baza fetare, si një gangrenë e keqe, që është instaluar në mendësitë provinciale të mbështetura edhe nga rrogtarë meskinë!

 

Të japë secili diçka nga vetja e tij për paqen me dinjitet, duke falur mirësi e dashuri, mirëkuptim e heshtje, sidomos në familje, me fëmijët, me të rinjtë e farefisin!

Nuk mund të prodhojmë paqe sociale, duke mbështetur “festat” e harameve, duke promovuar alkoolin, lakuriqësinë, devijimet morale dhe injorancën, në zemër të lagjeve tona dhe bri shtëpive të Zotit!

 

Rini e alkoolizuar, e droguar, rini hashashi, banalitetesh, nuk mund të jetë ajo që e themi në zhargonin e përditshëm: “e ardhmja e kombit”!

 

Alkool, zhurmë e çmendur deri në orë të vona, shëtitorja kryesore e qytetit e mbushur me flamuj me shishe birre, harbim para dyerve të Bashkisë, nuk është as më shumë e as më pak sesa një shfaqje e denjë për njerëz pa dinjitet, “pa din e pa iman”, siç e përmend shpesh edhe kryeministri i vendit!?

Mendoja se kjo tollovi dhe gjurulldi do të mbyllej një herë e mirë në Shkodër, por ja që parashikimi im i heshtur paska qenë i gabuar!

 

Imagjino, sa tribuna fetare e ligjërata, takime zyrtare, konferenca shkencore ndërfetare me vlerë, fushata të mbara sensibilizimi në bashkëpunim me policinë, me shkolla etj, për të udhëzuar opinionin kundër alkoolit, drogës, bimëve narkotike e të ngjashme dhe, papritur, krejt papritur, “Festa e birrës” që don të imponohet si traditë primitive në mesin tonë!

 

Sapo mbaroi java e parë e fillimit të vitit të ri shkollor. Para Bashkisë mund të shihnim një panair libri, një festival të letërsisë për fëmijë e të rritur, një fushatë sensibilizuese për leximin, shenjtërinë e librit, një seri mbrëmjesh letrare e poetike me shkrimtarët dhe poetët më me zë të qytetit e përtej, duke i mbështetur e vlerësuar, një panair të arritjeve të talenteve të Shkodrës në dije e shkencë, një.., por..!?

 

Nuk mund të ketë paqe, nëse nuk e kultivojmë dhe e jetojmë atë në familje fillimisht, pastaj në rrethin e ngushtë familjar, e më pas në shoqëri, me shumë kujdes e plot përkushtim, duke ndjekur dritën e Zotit dhe udhëzimin e Tij, jo interesat e ngushta, tekat e skutat e errëta!

 

Fjala e mirë është paqe! Buzëqeshja e sinqertë është paqe! Heshtja e urtë është paqe! Mësimi dhe edukimi i udhëzuar është paqe! Ndihma në rast nevoje është paqe! Luftimi i së keqes në jetë është paqe! Kundërshtimi i keqpërdorimit të besimit është paqe! Përballja me tërë fenomenet e prishjes dhe devijimit është paqe!

 

Paqe me Zotin! Paqe me robin! Paqe me vetveten e me realitetet e përditshme, që gjithsesi mbeten më të dobëta sesa mundësia për të ndryshuar kaderin!

 

Imam Muhamed B. Sytari
Myfti i Zonës Shkodër

 

Shkodër, më 21 shtator 2023


“Nata e Pritjes” në Prishtinë/ Qytetarët mblidhen për ta pritur gjithë natën vendimin e Hagës

Qytetarë të shumtë janë mbledhur sonte në sheshin “Ibrahim Rugova” në Prishtinë, në kuadër të “Natës së Pritjes”, në prag të shpalljes së vendimit nga Gjykata Speciale në Hagë ndaj ish-krerëve të UÇK-së, Hashim Thaçi, Kadri Veseli, Jakup Krasniqi dhe Rexhep Selimi.

 

Me flamuj të Kosovës dhe të UÇK-së, qytetarët kanë dalë në shesh për ta pritur vendimin që pritet të shpallet nesër në Hagë.

 

Nga sheshi, nënkryetarja e PDK-së, Besiana Musmurati, tha për Ekonomia Online se UÇK-ja është e lidhur ngushtë me popullin e Kosovës. 

 

Musmurati u shpreh se shpreson që vendimi të jetë “në anën e popullit”, duke kërkuar lirimin e ish-krerëve të UÇK-së.

 

Ajo tha se më së shumti i mungon energjia dbe inspirimi i tyre.

“Për energjinë e tyre, për inspirimin që e sjellin dhe për punën e tyre që Kosovën e kanë qitur gjithmonë para vetes”, tha ajo.

 

Ndërkohë, qytetarët vazhdojnë të qëndrojnë në sheshin “Ibrahim Rugova”, në pritje të vendimit nga Haga.

 

XS
SM
MD
LG