Lidhje


Rikthehen kontrollet në kufirin Shqipëri-Kosovë, kolona në Morinë

 

Pas pesë muajsh kalimi pa kontrolle, nga sot qytetarët që udhëtojnë mes Shqipërisë dhe Kosovës do t’i nënshtrohen sërish procedurave kufitare. Rikthimi i kontrolleve ka sjellë që në orët e para radhë dhe kolona automjetesh në pikën kufitare të Morinit.

 

Qytetarët e konsiderojnë të panevojshëm ndryshimin e procedurës disa herë gjatë vitit dhe kërkojnë një sistem të unifikuar që të shmangë pritjet në kufi. Për shkak të fluksit, Policia Kufitare ka shtuar sportelet në Morinë për të përshpejtuar kalimin e automjeteve.

 

Sipas marrëveshjes mes Shqipërisë dhe Kosovës, kontrollet rikthehen nga 1 deri më 31 tetor, ndërsa nga 1 nëntori deri më 28 shkurt automjetet me targa shqiptare dhe kosovare kalojnë sërish pa kontrolle. I njëjti regjim pa kontrolle zbatohet edhe nga 1 maji deri më 30 shtator.


Bardhi: SHISH ka marrë pajisje të avancuara, janë përgjuar gazetarë dhe diplomatë

 

Kryetari i Grupit Parlamentar të PD Gazment Bardhi në një intervistë në “Prime News24” ka dhënë një deklaratë të fortë duke thënë se SHISH gjatë kohëve të fundit kishte blerë pajisje përgjimi shumë të avancuar për përgjime ambientale, të gjitha këto në kohë që drejtohej nga Vlora Hyseni.

 

“Sa kohë SHISH ishte vënë në shërbim të krimit nuk përjashtoj asnjë veprim anti-ligjor të ndodhur në atë institucion. Sa herë bëj një denoncim të fortë forcat operacionale të policisë më vëzhgojnë për 1 muaj ose 1 muaj e gjysme ku hyj ku dal. Të mbledhin informacione. Nuk më shqetësojnë të them të drejtën”, tha ai.

 

Bardhi foli edhe në lidhje me faktin që sipas tij SHISH ka blerë një pajisje shumë të avancuar për përgjim ambiental, pajisje që tashmë është në dorën e një prej grupeve më të rrezikshme kriminale sipas tij.

 

“Ka informacione që janë përgjuar gazetarë, seli diplomatike në Shqipëri. SHISH kishte blerë një pajisje shumë të avancuar për përgjimet ambientale, por kjo mbetet për t’u verifikuar. Thuhet se ajo pajisje nuk është më në SHISH, por ndodhet pranë një prej grupeve më të rrezikshme”, - tha ai.

 

Bardhi shtoi se ka informacione se Vlora Hyseni ka kërkuar nga SPAK të informohej paraprakisht ku të “goditeshin” figura të politikës apo grupe kriminale në vend. 


41% e shqiptarëve nuk përballojnë dot blerjen e një makine, rekord në Europë

 

Ndonëse stoku i makinave që qarkullojnë në vend sa vjen e po rritet, sërish një pjesë e madhe e shqiptarëve pohojnë se nuk e përballojnë sot blerjen e një automjeti.

 

Sipas të dhënave të publikuara nga Eurostat, 41% e shqiptarëve deklaruan në vitin 2023 se nuk mund të përballojnë blerjen e një makine personale. Kjo shifër është shumë më e lartë se ajo e mesatares së Bashkimit Europian, prej 5.6% në vitin 2023 dhe 5.5% në 2025-n.

 

Shifra është më e larta dhe në rajon. 16% e serbëve deklaruar në 2023-n se nuk blinin dot një automjet. Në 2025-n treguesi ra lehtë në 15%.

Në Maqedoninë e Veriut vetëm 13% nuk mund të blejë automjet, sipas të dhënave që i referohen vitit 2024. Në Mal të Zi, përqindja është akoma më e ulët, vetëm 8.9% në 2024-n. Të dhënat për Bosnjë Hercegovinën dhe Kosovën mungojnë.

 

Përqindja më e lartë e shqiptarëve që deklarojnë që nuk blejnë dot makinë është nga personat që janë vetëm, me 66% të meshkujve të saj kategori dhe 88% të femrave.

 

Ndonëse vitet e fundit është rritu ndjeshëm numri i mjeteve në qarkullim, me rreth 100 mijë makina që janë regjistruar për herë të parë përkatësisht në 2024 dhe 2025, sërish Shqipëria vijon të jetë një ndër vendet me numrin më të ulët të automjeteve në raport me popullsinë.

 

Sipas të dhënave të tjera nga Drejtoria e Përgjithshme e Transportit Rrugor (DPSHTRR) në fund të vitit 2025, në vend kishte gjithsej 847 mijë autovetura personale në qarkullim.

 

Në raport me popullsinë, më shumë se një në tre banorë kanë një veturë, ose 360 autovetura për 1000 banorë. Kjo shifër është gati sa gjysma e mesatares së Bashkimit Europian prej 578 makina për 1000 banorë, sipas të dhënave të tjera të Eurostat.

 

Megjithatë, pas rishikimit në ulje të popullsisë, Shqipëria ka ikur nga fundi i listës dhe renditet e treta në rajon, pas Malit të ZI (442) dhe duke iu afruar Serbisë (394), teksa ka lënë pas Maqedoninë e Veriut (338) dhe Bosnjën (338).

 

Në Europë, më pak makina kanë Kosova (241) dhe Turqia (203).

Rekordin e mban Italia, me 709 makina për 1000 banorë, e ndjekur nga Finlanda (671), Qipro (670).

 

Europa

Sipas Eurostat, në vitin 2025, 5,5% e popullsisë së Bashkimit Europian nuk mund të përballonte një makinë për përdorim personal, sipas Eurostat. Përqindja më e lartë u regjistrua në Finlandë, me 11,3%, e ndjekur nga Hungaria me 10,4% dhe Bullgaria me 10,0%.

 

Në anën tjetër, nivelet më të ulëta u shënuan në Qipro (1,6%), Slloveni (1,7%) dhe Kroaci (2,6%). Treguesi mat pjesën e popullsisë që jeton në familje të cilat deklarojnë se nuk kanë mundësi financiare të zotërojnë një makinë për përdorim personal.

 


Pas shkarkimeve në Bashkinë e Tiranës, Veliaj sfidon qeverinë për Reformën Territoriale: Nuk është konsultuar me qytetarët

 

Kryetari i Bashkisë së Tiranës, Erion Veliaj, ka dalë kundër mënyrës se si po zhvillohet Reforma Administrativo-Territoriale, duke kërkuar pezullimin e shqyrtimit përfundimtar të projektligjit për hartën e re.

 

Përmes një letre drejtuar deputetëve, Veliaj sqaron se nuk është kundër rishikimit të hartës territoriale, por kundërshton procedurën e ndjekur, duke argumentuar se qytetarët e prekur nga ndryshimi i kufijve duhet të konsultohen paraprakisht.

 

Sipas Veliajt, projektligji është hartuar dhe depozituar me ndarjen e re territoriale, ndërsa mendimi i qytetarëve kërkohet vetëm pasi zgjidhja është formuluar. Ai paralajmëron se në këtë mënyrë konsultimi rrezikon të kthehet në një formalitet për një projekt të përgatitur më parë.

 

Kryebashkiaku ndalet konkretisht edhe te Tirana, pasi projekti parashikon përfshirjen e njësisë administrative të Rinasit në territorin e kryeqytetit. Veliaj kërkon që përpara një vendimmarrjeje të ketë një vlerësim të plotë për ndikimin që ky ndryshim do të ketë te popullsia, shërbimet, financat, pronat dhe administrimi vendor.

 

Në përfundim, Veliaj kërkon pezullimin e shqyrtimit përfundimtar të projektligjit deri në zhvillimin e një konsultimi real me qytetarët, rezultatet e të cilit duhet të kenë mundësi të ndikojnë edhe në ndryshimin e hartës së propozuar.

 

“Kur Kushtetuta kërkon që qytetarët të dëgjohen, detyra jonë është të krijojmë kushtet që ata të flasin vetë dhe pastaj t’i dëgjojmë”, përfundon Veliaj.


Diploma në Shqipëri nuk “ha bukë”, tregu kërkon zanatçinj

 

Tregu shqiptar i punës dominohet nga profesionet me aftësi të mesme. Sipas ILO-s, në vitin 2024 rreth 74% e të punësuarve ishin në profesione të këtij niveli, kryesisht në shërbime, tregti, ndërtim, industri dhe bujqësi. Ndërkohë, profesionet që kërkojnë kualifikim të lartë mbeten më të pakta.

 

Në vitin 2025, sipas AKPA-s, u shpallën 68,860 vende të lira pune, 12% më shumë se një vit më parë. Kërkesa më e madhe ishte për profesionet elementare (29.9%), zanatçinjtë (23.7%), shitjet dhe shërbimet (15.9%) dhe industrinë (10.5%).

 

Ndërsa për specialistët me arsim të lartë u shpallën vetëm 6.4% e vendeve të lira. Të dhënat tregojnë se tregu kërkon më shumë punonjës praktikë dhe zanatçinj, ndërsa mbetet më e kufizuar oferta për profesionistë të teknologjisë, inxhinierisë dhe sektorëve të tjerë të specializuar.

XS
SM
MD
LG