Gjykata e Lartë nuk pranon rekursin, mbetet në fuqi pezullimi nga detyra i Belinda Ballukut. Masa ka qenë “pezullim nga ushtrimi i funksioneve”. Ankimimi ishte bërë nga avokatët e ish-zv/kryeministres Balluku, e cila e cilësonte të paligjshëm masën e vendosur nga GJKKO me kërkesë të SPAK që nga fillimi i këtij viti.
Shqipëria vazhdon të mos ketë avionë të saj për ndërhyrjen nga ajri kundër zjarreve, ndërsa afati për vënien e tyre në përdorim është shtyrë drejt vitit 2027. Ministria e Mbrojtjes nuk ka dhënë ende informacion konkret mbi statusin e kontratës për blerjen e dy mjeteve ajrore të premtuara prej disa vitesh. Në janar, ministri i atëhershëm i Mbrojtjes, Pirro Vëngu, deklaroi se fondet për dy avionët janë parashikuar në buxhetin e vitit 2026 dhe se kontrata ishte ende në negocim. Sipas tij, njëri avion mund të mbërrijë gjatë këtij viti, por prodhimi i mjeteve dhe trajnimi i pilotëve e shtyjnë përdorimin e tyre në operacionet zjarrfikëse deri në vitin 2027.
Seanca e sotme plenare në Kuvendin e Shqipërisë ka nisur me tensione dhe debate të ashpra lidhur me qëndrimin e qeverisë ndaj deklaratave kërcënuese të zyrtarëve serbë për Kosovën. Deputeti Redi Muçi, i pari që mori fjalën, akuzoi kryeministrin Edi Rama për heshtje të pajustifikueshme përballë kërcënimeve për "spastrim etnik".
Elisa Spiropali ka bërë publik një mocion të dërguar kryeministrit dhe kryetarit të Partisë Socialiste, Edi Rama, Asamblesë Kombëtare, anëtarësisë dhe Grupit Parlamentar socialist, për hapjen e një dialogu kombëtar mbi atë që ajo e quan “Marrëveshja e Re për Shqipërinë”. Në dokument, Spiropali vlerëson se mobilizimi qytetar dhe protestat e javëve të fundit nuk duhet të shpërfillen apo të trajtohen si kërcënim, por si një kërkesë për më shumë përfaqësim, llogaridhënie, meritokraci dhe kufizim të personalizimit të pushtetit.
Shqipëria vazhdon të jetë destinacioni kryesor i pushimeve për qytetarët e Kosovës edhe gjatë sezonit veror 2026. Përfaqësues të sektorit të turizmit dhe biznesit thonë se, pas një periudhe kur shumë kosovarë provuan destinacione të tjera evropiane pas liberalizimit të vizave, një pjesë e madhe janë rikthyer sërish në bregdetin shqiptar, të tërhequr nga çmimet, afërsia, infrastruktura dhe oferta turistike.
