Ushtria izraelite po përgatitet t'u japë fund sulmeve të saj tokësore në Rripin e Gazës.
Në lajmin e televizionit shtetëror izraelit KAN të bazuar në burime të paidentifikuara thuhet se "Sipas sukseseve operacionale, ushtria izraelite po përgatitet që në javët e ardhshme të kalojë në fazën e tretë të konfliktit në Gaza".
Organizata Mjekët pa Kufij (MSF) paralajmëroi se sulmet pa kriter që Izraeli i ka vazhduar që nga 7 tetori e kanë kthyer veriun e Rripit të Gazës në grumbull rrënojash.
MSF-ja bëri një postim nga llogaria e saj në platformën sociale "X" lidhur me situatën në Gaza, e cila ndodhet nën sulmet dhe bllokadën intensive të Izraelit.
Një grup aktivistësh hebrenj izraelitë u mblodhën para Konsullatës së SHBA-së në Kudsin Perëndimor dhe protestuan kundër sulmeve të Izraelit në Rripin e Gazës.
Grupi bëri thirrje për ndalimin e luftës sa më shpejt të jetë e mundur dhe mbante fotografi të fëmijëve, grave dhe të moshuarve të vrarë në Gaza.
Presidenti rus, Vladimir Putin, në një bisedë telefonike ka informuar homologun e tij palestinez, Mahmoud Abbas, për hapat që Moska po ndërmerr për të ndihmuar në de-përshkallëzimin e konfliktit në Gaza dhe për të siguruar dërgimin e pandërprerë të ndihmave humanitare për ata që kanë nevojë.
Kremlini njoftoi se Putin gjithashtu premtoi se Rusia do të vazhdojë të dërgojë ndihma humanitare në enklavën e rrethuar palestineze, përfshirë ilaçe dhe pajisje mjekësore.
Policia izraelite e cila prej 11 javësh pengon faljen e namazit te xhumasë në xhaminë Al-Aksa në Kudsin Lindor nën pushtim, ka plagosur 2 palestinezë duke ndërhyrë ndaj palestinezëve që donin të falnin namazin e xhumasë përreth Al-Aksës.
Forcat izraelite vendosën barriera hekuri në rrugët në zonën e Qytetit të Vjetër të Kudsit në të cilën ndodhet xhamia Al-Aksa dhe që nga orët e mëngjesit nuk lejuan hyrjen në Al-Aksa për të rinjtë palestinezë, madje herë-herë edhe për palestinezët e moshuar.
