Plani i Egjiptit për Gazën, i cili mbështetet nga të gjithë anëtarët e Organizatës së Bashkëpunimit Islamik (OBI), ofron një kuadër konstruktiv, tha Fidan në adresimin e tij gjatë takimit të Grupit të Kontaktit për Gazën të OBI dhe Ligës Arabe në kryeqytetin egjiptian, Kajro, shtuan burimet.
Duke theksuar se gjenocidi, zhvendosja e detyruar dhe aparteidi vazhdojnë ende në Gaza gjatë zhvillimit të këtij takimi, Fidan tha se sulmet ajrore izraelite më 18 mars treguan se Izraeli ka një axhendë më të gjerë.
Ai theksoi se parandalimi i ndihmave humanitare dhe shënjestrimi i territoreve siriane dhe libaneze janë tregues të këmbënguljes së Izraelit në këtë politikë ekspansioniste.
Kryeministri kanadez shpall zgjedhje të parakohshme vetëm nëntë ditë pasi mori detyrën
Kanadaja shkon në zgjedhje të parakohshme më 28 prill, pasi kryeministri i sapoemëruar, Mark Carney, shpalli mbajtjen e tyre vetëm nëntë ditë pasi mori detyrën. Vendimi vjen në një moment të tensionuar për vendin, i cili po përballet me një luftë tregtare dhe kërcënime ndaj sovranitetit nga presidenti amerikan Donald Trump – çështje që pritet të jenë kryesore në fushatë, raporton BBC
Carney, i cili vjen nga radhët e liberalëve, mori detyrën pas dorëheqjes së Justin Trudeau. Ai do të përballet në zgjedhje me liderin e Partisë Konservatore, Pierre Poilievre, i cili ka kryesuar në sondazhe që nga mesi i vitit 2023. Megjithatë, sondazhet e fundit tregojnë një garë të ngushtë mes dy liderëve.
Zelenski kërkon prej aleatëve të bëjnë presion ndaj Rusisë
Presidenti Volodymyr Zelenski u bëri thirrje aleatëve të Ukrainës që të ushtrojnë përsëri presion të ri ndaj Moskës për të ndaluar luftën. Thirrja erdhi pasi gati 150 dronë rusë goditën Kievin dhe qytete të tjera të Ukrainës gjatë natës së të shtunës (22.03), duke vrarë të paktën shtatë vetë.
"Nevojiten vendime të reja dhe presioni i ri mbi Moskën për t'u dhënë fund këtyre sulmeve dhe kësaj lufte”, postoi Zelenski në mediat sociale përpara bisedimeve për një armëpushim të pjesshëm që janë planifikuar për t'u zhvilluar të hënën në Arabinë Saudite.