Gjysmëhëna e Kuqe Palestineze njoftoi se ushtria izraelite goditi qendrën e Rripit të Gazës së bllokuar në qytetin Khan Younis dhe se 7 persona u plagosën nga sulmi.
Në deklaratën me shkrim të Gjysmëhënës së Kuqe Palestineze thuhet se ushtria izraelite ka shënjestruar katin e 5-të të selisë së tyre në Khan Younis.
Zyra e mediave e qeverisë palestineze në Gaza tha se ushtria izraelite kreu gjashtë masakra brenda tre ditëve duke i shtyrë me forcë njerëzit në zonat që pretendohej se ishin "të sigurta" në qytetin Rafah në pjesën jugore të Rripit të Gazës, dhe më pas i bombarduan ato zona duke rezultuar në vdekjen e 31 personave.
"Lufta gjenocidale kundër civilëve, fëmijëve dhe grave në Rripin e Gazës do të mbetet një njollë për njerëzimin dhe gjithë botën që dëshmoi këto krime dhe mbeti joaktive për t'i dhënë fund kësaj lufte të pamoralshme të gjenocidit", thuhet në deklaratën e qeverisë.
Holanda ka reaguar ndaj deklaratave të ministrit izraelit të Sigurisë Kombëtare, Itamar Ben-Gvir dhe ministrit të Financave, Bezalel Smotrich të cilët kërkojnë "migrim vullnetar të palestinezëve nga Rripi i Gazës".
Në një deklaratë nga Ministria e Jashtme e Holandës thuhet: "Deklaratat e fundit të ministrave izraelitë Smotrich dhe Ben-Gvir lidhur me zhvendosjen e palestinezëve nga Gaza janë të papërgjegjshme".
Pretendohet se zyrtarët izraelitë po zhvillojnë bisedime të fshehta me Kongon dhe vende të tjera për zhvendosjen e detyruar të palestinezëve nga Rripi i Gazës.
Pavarësisht reagimeve nga komuniteti ndërkombëtar, Izraeli vazhdon sulmet ndaj Rripit të Gazës nën bllokadë. Për shkak të këtyre sulmeve në Gaza janë zhvendosur 1.9 milion palestinezë.
Shtetet e Bashkuara mohuan pretendimet se Washingtoni ose Tel Avivi qëndrojnë pas sulmit vdekjeprurës në Iran, ku po mbahej një ceremoni për të përkujtuar gjeneralin e lartë iranian Qassem Soleimani, i cili u vra katër vjet më parë nga SHBA-ja.
“Shtetet e Bashkuara nuk u përfshinë në asnjë mënyrë dhe çdo sugjerim për të kundërtën është qesharak”, tha zëdhënësi i Departamentit të Shtetit Matthew Miller gjatë një konference të përditshme për shtyp.
