Lidhje


Associated Press: Gaz lotsjellës dhe ujë me presion, policia përleshet me protestuesit

 

Agjencia e njohur amerikane e lajmeve Associated Press  i ka kushtuar një artikull protestave antiqeveritare në Shqipëri, ku për të tetën ditë radhazi janë shënuar përplasje mes protestuesve dhe policisë në kryeqytet. Sipas AP-së, policia përdori gaz lotsjellës dhe topa uji për të shpërndarë protestuesit, ndërsa demonstruesit hodhën gurë, flakadanë, bomba molotov dhe fishekzjarrë gjatë përplasjeve në qendër të Tiranës.

 

Në protestë janë përfshirë edhe gjimnazistë dhe studentë universitarë, të cilët kërkojnë uljen e tarifave të studimit, rritjen e investimeve publike në arsim dhe luftën kundër korrupsionit në sistemin arsimor. Kërkesave të tyre u është bashkuar edhe thirrja e lëvizjes më të gjerë antiqeveritare për dorëheqjen e kryeministrit Edi Rama.

 

Agjencia amerikane thotë se qytetarët po protestojnë për rritjen e kostos së jetesës, problemet në arsim, dobësimin e shërbimeve publike dhe vështirësitë për të siguruar strehim të përballueshëm.

 

Shkrimi rikujton gjithashtu protestat e muajve të fundit kundër një projekti të madh turistik luksoz në bregdetin jugor të Shqipërisë, të lidhur me një kompani investimesh të themeluar nga Jared Kushner, dhëndri i presidentit amerikan Donald Trump. Duke komentuar protestat, kryeministri Edi Rama i cilësoi aktet e dhunës si një përpjekje për të ndryshuar pushtetin përmes forcës.

 

“Një valë gurësh, një përpjekje për të rrëzuar qeverinë dhe për të ndryshuar ata që janë në pushtet përmes imponimit të dhunës”,deklaroi Rama, sipas Associated Press.

 

Kryeministri argumentoi se shqetësimet e qytetarëve për koston e jetesës, strehimin dhe të ardhmen po shfrytëzohen nga persona që, sipas tij, nxisin qëllimisht dhunën gjatë demonstratave. Ai i akuzoi protestuesit se po krijojnë një klimë terrori në kryeqytet dhe i përshkroi studentët e përfshirë në protesta si pjesë të rrymave në zhvillim të ekstremizmit politik.


Protesta, 310 të lënduar që prej 13 tetorit!

 

310 persona janë lënduar që prej 13 tetorit, gjatë situatave të lidhura me protestat, sipas të dhënave të raportuara nga strukturat spitalore.

Sipas njoftimit të Spitalit Universitar të Traumës, gjatë ditës së sotme janë paraqitur për ndihmë mjekësore katër kalimtarë.

 

 
Njëri prej tyre, përfaqësues i medias ndërkombëtare, ka marrë trajtimin e nevojshëm dhe është larguar nga spitali në gjendje jashtë rrezikut për jetën, me këshillën e mjekut.

Aktualisht, në Spitalin Universitar të Traumës ndodhen dy kalimtarë, të cilët po i nënshtrohen ekzaminimeve të nevojshme. Një tjetër kalimtar i lënduar gjatë protestës është larguar pasi ka marrë trajtimin mjekësor.

 

Ndërkohë, sipas të dhënave të Qendrës Spitalore Universitare “Nënë Tereza”, gjatë ditës së sotme janë paraqitur për ndihmë mjekësore tre persona: një efektiv policie, një protestues i mitur dhe një përfaqësues i medias. Të tre ndodhen në gjendje shëndetësore stabël.

 

Bilanci i të lënduarve që prej 13 tetorit:

Në total, 310 persona kanë marrë ndihmë mjekësore që prej 13 tetorit, sipas të dhënave të raportuara nga strukturat spitalore.


Eurodeputetja: Rama nuk pranon të dëgjojë, po dhunohen dhe arrestohen fëmijët

 

Eurodeputetja holandeze Anna Strolenberg ka ngritur në Parlamentin Europian çështjen e dhunës së policisë ndaj studentëve protestues në Shqipëri, duke i kërkuar Bashkimit Europian të mos qëndrojë indiferent përballë pamjeve të të rinjve të qëlluar me plumba gome, të rrahur dhe të arrestuar.

Në fjalën e saj, Strolenberg e vendosi në qendër të mesazhit përgjegjësinë e Edi Ramës dhe reagimin e institucioneve europiane, duke theksuar se Shqipëria nuk mund të trajtohet si pronë e kryeministrit.

 

Ajo tha se çdo ditë përballet me pamje nga protestat që, sipas saj, tregojnë përdorimin e forcës ndaj të rinjve, ndërsa e akuzoi Ramën se nuk dëgjon kërkesat e qytetarëve dhe nuk pranon të ndryshojë qëndrimin e tij.

‘Protestues të qëlluar me plumba gome, fëmijë të rrahur dhe të arrestuar. E gjitha kjo sepse Edi Rama nuk dëgjon dhe nuk pranon të ndryshojë’, u shpreh Strolenberg.

 

 Fjalimi i eurodeputetes Anna Strolenberg:

Dëshiroj të kërkoj një mocion për procedurë, në përputhje me nenin 202 të Rregullores së Procedurës.

 

Shqipëria e shqiptarëve.

Shqipëria e shqiptarëve dhe jo Shqipëria e Edi Ramës dhe e të pasurve.

Çdo ditë më vijnë pamje të cilave nuk mund t’ua kthej shpinën. Protestues të qëlluar me plumba gome, fëmijë të rrahur dhe të arrestuar. E gjitha kjo sepse Edi Rama nuk dëgjon dhe nuk pranon të ndryshojë.

 

Më vjen turp që BE-ja dënoi vetëm dhunën e disa protestuesve të dhunshëm, por nuk dënoi dhunën e tepruar të policisë ndaj shumicës së protestuesve paqësorë.

Ne flasim për vlerat, por nuk bëjmë asgjë kur ato vlera shkelen.

 

Njerëzit mund t’i falin armiqtë e tyre, por nuk do ta falin një mik që i braktis.

Ne kemi mjete ndikimi, sepse Shqipëria dëshiron të bëhet pjesë e BE-së dhe qeveria e saj duhet të ndërmarrë ndryshime të mëdha, të luftojë korrupsionin, të reformojë policinë dhe të mbrojë qytetarët e saj.

 

Shqipëria është pjesë e familjes evropiane dhe një familje qëndron në krah të njëri-tjetrit.

 


Sigurimi i pronës, ecuri e dobët edhe për vitin 2026

 

Sigurimi i pronës në Shqipëri po shfaq ecuri të dobët edhe gjatë këtij viti. Sipas të dhënave nga Autoritetit i Mbikëqyrjes Financiare (AMF), për tetë muajt e vitit 2026 primet e shkruara bruto të sigurimit të pronës nga zjarri dhe forcat e natyrës, si edhe sigurimet nga dëmtimet e tjera në pronës kishin vlerën e 1.74 miliardë lekëve, në rënie me 13.3% krahasuar me të njëjtën periudhë të një viti më parë. 

 

Kjo ka bërë që pesha e këtyre produkteve të bjerë në 10.4% të volumit të përgjithshëm të primeve të shkruara bruto, nga 12.2% që kishte qenë një vit më parë. Ecuria e tregut paraqitet e dobët në të dy produktet kryesore, sigurimi nga zjarri dhe forcat e natyrës dhe sigurimet e tjera në pronë.

Primet e shkruara bruto për sigurimin nga zjarri dhe forcat e natyrës ranë në 1.49 miliardë lekë, 11.2% më pak krahasuar me një vit më parë. Ndërsa sigurimet nga dëmtimet e tjera në pronë ranë në 247 milionë lekë, 24.1% më pak krahasuar me 8-mujorin 2025.

 

Megjithëse ligjërisht sigurimi i pronës nga fatkeqësitë natyrore është vullnetar, në praktikë pjesa më e madhe e kontratave të sigurimit për këtë produkt janë të lidhura me pronat e lëna si kolateral për kreditë bankare.

Në rastet kur kredia është e siguruar me kolateral, sigurimi i tij është kusht i vendosur nga banka për huamarrësin, ndaj edhe në këtë rast bëhet fjalë për një produkt faktikisht të detyrueshëm.

 

Rritja e shpejtë e kredisë për pasuri të paluajtshme në vitet e fundit ka mbështetur edhe rritjen e tregut të sigurimit të pronës, por përmasat e tij ngelen shumë modeste dhe zënë një peshë të ulët kundrejt volumit total të tregut të sigurimeve në vend.

Bazuar në numrin vjetor të policave të sigurimit, mund të vlerësohet se në Shqipëri janë të siguruara afërsisht 5% e numrit të përgjithshëm të banesave (duke iu referuar Censit 2023).

 

Më shumë se 90% e primeve të sigurimit nga katastrofat natyrore janë të përqendruara në qarkun e Tiranës, ndërsa pjesa tjetër e vendit është në masën dërrmuese e pambuluar ndaj këtyre rreziqeve.

Duke parë shkallën e ulët të mbulimit vullnetar me sigurime të pronës, qeveria shqiptare ka ndërmarrë një nismë ligjore për sigurimin e detyrueshëm të banesave nga tërmetet.

 

Ai përcakton detyrimin për sigurimin e të gjitha banesave në vend, me pak përjashtime (psh. shtëpitë e ndërtuara prej argjile, qerpiçi, kallami, etj. apo ndërtesave me vendndodhje të lëvizshme apo të përkohshme).

Skema e sigurimit do të administrohet nga një ent i posaçëm me kapital shtetëror që do të ngrihet për këtë qëllim, Fondi Kombëtar për Sigurimin e Detyrueshëm nga Tërmetet.

 

Shuma e sigurimit do të përcaktohet me vendim të Këshillit të Ministrave, ndërsa primi i sigurimit që do të paguajnë pronarët e banesave do të përcaktohet nga Fondi për Tërmetet, pas marrjes së pëlqimit nga ministri përgjegjës për financat.

 

Megjithatë, industria e sigurimeve është shprehur në vijimësi kundër kësaj skeme, duke kërkuar një zgjidhje tjetër, që të përfshijë edhe shoqëritë private të sigurimit.

 


Protestat në kryeqytet, Ambasada e Izraelit në Tiranë: Prej sot do të jemi të mbyllur, hapja do të varet nga zhvillimi i situatës

Ambasada e Izraelit në Tiranë ka njoftuar se për shkak të situatës aktuale me protestat në kryeqytet, do të qëndrojë e mbyllur prej ditës së sotme deri në një afat të pacaktuar.

 

Njoftimi është bërë nga faqja zyrtare e Ambasadës, teksa thuhet se për çdo rast urgjent, do duhet të kontaktojnë me numrin celular të emergjencës.

 

“Për shkak të zhvillimeve të fundit, Ambasada e Izraelit në Tiranë është aktualisht e mbyllur.

 

Rihapja e Ambasadës do të varet nga mënyra se si do të zhvillohet situata. Për çështje urgjente konsullore, ju lutemi kontaktoni numrin celular të emergjencës të Ambasadës.

 

Ju falënderojmë për mirëkuptimin dhe do të ofrojmë përditësime të mëtejshme sipas nevojës”, thuhet në njoftim.

XS
SM
MD
LG