Lidhje


Të rinjtë e Shqipërisë ndryshe nga ata të Kosovës, nuk kërkojnë partnerë të virgjër, por fetarë

 

Të rinjtë në Shqipëri po ndryshojnë prioritetet në zgjedhjen e partnerit, duke i kushtuar më pak rëndësi virgjërisë, miratimit të familjes dhe nivelit arsimor, ndërsa besimi fetar dhe gjendja ekonomike kanë fituar më shumë peshë. Sipas anketave të Fondacionit Friedrich Ebert (FES), të publikuara në një grafik krahasues nga AlbanianStats, përqindja e të rinjve që e konsiderojnë virgjërinë të rëndësishme ose shumë të rëndësishme ka rënë nga 46% në vitin 2011 në vetëm 19% në vitin 2024.

 

Rënie është regjistruar edhe te miratimi i familjes, nga 73% në 60%, si dhe te niveli arsimor i partnerit, nga 77% në 64%. Në të kundërt, rëndësia e besimit fetar është rritur nga 17% në 27%, ndërsa gjendja ekonomike nga 41% në 44%, duke reflektuar ndryshimin e kritereve që të rinjtë shqiptarë vlerësojnë në një marrëdhënie.

 

Krahasimi me Kosovën nxjerr në pah dallime të dukshme. Në vitin 2024, virgjërinë e konsideronin të rëndësishme 56% e të rinjve kosovarë, kundrejt 19% në Shqipëri, ndërsa miratimi i familjes dhe besimi fetar arrinin përkatësisht në 80% dhe 79% në Kosovë, kundrejt 60% dhe 27% në Shqipëri. Edhe rëndësia e gjendjes ekonomike është rritur më shumë në Kosovë, nga 43% në 53%, ndërsa niveli arsimor mbetet një kriter i rëndësishëm në të dy vendet, pavarësisht rënies së peshës së tij.


Sani Sanilevich pronar i Jet Bank dhe Interesat izraelite në Shqipëri! Investigimi: Kush është ish-këshilltari i Netanyahut

 

Sani Sanilevich, i cili ka shërbyer si këshilltar i kryeministrit Benjamin Netanyahu, po e çon kompaninë familjare të pasurive të paluajtshme në Bursën e Tel Avivit. Kemi mësuar se kompania Sanilevich Real Estate Entrepreneurship do të përpiqet të sigurojë 200–250 milionë shekelë përmes emetimit të obligacioneve, bazuar në raportet financiare të tremujorit të dytë të vitit 2026. Emisionin e obligacioneve do ta udhëheqë kompania Leader Underwriting.

 

Sani Sanilevich pronar i Jet Bank dhe Interesat izraelite në Shqipëri! Investigimi: Kush është ish-këshilltari i Netanyahut

Emetimi synon, ndër të tjera, t’i japë kompanisë mundësinë të provojë për herë të parë praninë e saj në bursë, në përgatitje për një emetim të mundshëm të ardhshëm të aksioneve. Për momentin, nuk është e qartë se kur ose nëse do të realizohet një gjë e tillë.

 

Për shkak të vështirësive aktuale në tregun e pasurive të paluajtshme, kompanitë e këtij sektori që dëshirojnë të hyjnë në bursë priren fillimisht të sigurojnë financim përmes obligacioneve, duke e përgatitur terrenin për një emetim të ardhshëm të aksioneve. Kjo prirje ka nisur rreth dy vjet më parë, me kompani të tilla si Amram Abraham dhe Beser, ndër të tjera.

 

Sanilevich Real Estate, ku Sani mban pozicionin e drejtorit të përgjithshëm, zotëron një projekt të madh të pasurive të paluajtshme me të ardhura nga qiratë në parkun Neve Ne’eman, në Hod Hasharon.

 

Kompleksin e ndërtoi së bashku me dy partnerë, mes tyre Haim, babai i Sanilevich, i cili ndërroi jetë 13 vjet më parë. Haim e kishte nisur karrierën si fermer, përpara se të kalonte në sektorin e pasurive të paluajtshme.

 

Në vitin 2020 nisën negociatat për blerjen e kompleksit nga partnerët që dëshironin të shisnin pjesët e tyre. Kompania Afy Nivim dhe familja Sanilevich blenë dy të tretat e aksioneve të partnerëve për 440 milionë shekelë, bazuar në një vlerësim total të kompleksit prej 656 milionë shekelësh. Afy Nivim bleu 50% të kompleksit, me një investim prej 328 milionë shekelësh.

 

Parku përfshin 48 mijë metra katrorë sipërfaqe të ndërtuar dhe tre ndërtesa të tjera që pritet të ngrihen:

Një ndërtesë zyrash me sipërfaqe 82 mijë metra katrorë.

 

Një ndërtesë tjetër zyrash me sipërfaqe 20 mijë metra katrorë.

Një kompleks banimi të asistuar për të moshuarit, në një sipërfaqe prej 65 mijë metrash katrorë.

 

Kompania zotëron gjithashtu dy dynymë tokë brenda kompleksit, të destinuara për ndërtime të ardhshme.

Ndër qiramarrësit e parkut janë kompani të tilla si Merck Israel, Valens dhe Harman–Samsung.

 

Një tjetër pasuri që do të përfshihet në kompaninë që synon të hyjë në bursë është një sipërfaqe toke bujqësore prej më shumë se 200 dynymësh në Tel Mond, të cilën Sanilevich e zotëron së bashku me kompaninë Mega Or të Tzachi Nahmias. Synimi është që toka të ndryshojë destinacion dhe të përdoret për veprimtari logjistike.

 

Një parcelë e tretë përbëhet nga 190 dynymë tokë në Hadera, ku familja zotëron një të tretën e të drejtave. Synimi është që toka të riklasifikohet për ndërtim banesash dhe, ndoshta, edhe për projekte energjetike, si një central elektrik ose një qendër të dhënash (data center).

 

Familja zotëron edhe toka të tjera bujqësore, të cilat nuk do të përfshihen në kompaninë që do të dalë në bursë, por do të mbeten në pronësi të saj.

Më herët, mediat kanë raportuar se Sanilevich po përpiqet të krijojë një spital në Shqipëri së bashku me Yardena Ovadia. Sipas raportimit, ai zotëron gjithashtu një bankë digjitale në Shqipëri dhe kompani në sektorët e pasurive të paluajtshme dhe turizmit.

 

Sanilevich shërbeu si këshilltar i Netanyahu-t gjatë viteve 2006–2011, por, sipas informacioneve të disponueshme, sot nuk ka më lidhje mes tyre.

Në emisionin investigativ televiziv «Uvda», në muajin maj të këtij viti, u raportua se Edi Rama, kryeministri i Shqipërisë dhe mik i afërt i Sanilevich, i ishte ankuar këtij të fundit për presionet që, sipas raportimit, Netanyahu kishte ushtruar ndaj tij për të emëruar Nicole Raidman, e afërt me bashkëshorten e kryeministrit izraelit, Sara Netanyahu, si konsulle nderi të Shqipërisë në Izrael.

 

 

 


Gjyqi ndaj Veliajt/ Dumani kërkon vijimin e procesit pa avokatë, GJKKO gjobit mbrojtësit me nga 100 mijë lekë

 

Në procesin ndaj kryebashkiakut të Tiranës, Erion Veliaj dhe të pandehurve të tjerë, prokurori i posaçëm Altin Dumani i kërkoi Gjykatës së Posaçme të shohë mundësinë që seancat të vijojnë pa praninë e mbrojtësve ligjorë, duke e konsideruar bojkotin si shkak të paligjshëm për mospjesëmarrje.

 

“Mbrojtja është një e drejtë. Duke parë sjelljen e të pandehurve dhe avokatëve, vlerësojmë se Gjykata duhet të shqyrtojë mundësinë që ta konsiderojë sjelljen e tyre si heqje dorë nga kjo e drejtë dhe të vijojë gjyqin pa avokat. Gjykata e Apelit e ka një precedent të tillë, ku ka shqyrtuar çështje pa avokat”, deklaroi Dumani. Por gjykata tha se lidhur me këtë kërkesë do të shprehet në një moment të dytë.

 

Për shkak se avokatët vijojnë prej më shumë se një muaji bojkotin në shenjë proteste ndaj rregullores së gjykatës, seanca e radhës u shty në datën 27 tetor. Ndërkohë që trupa gjykuese caktoi avokatë për të pandehurit nga lista e ndihmës juridike falas e Ministrisë së Drejtësisë. GJKKO gjobiti po ashtu me nga 100 mijë lekë mbrojtësit.

 

Erion Veliaj, bashkëshortja e tij, Ajola Xoxa dhe të pandehurit e tjerë po gjykohen për korrupsion, pastrim parash e fshehje të pasurisë.


BKH zbarkon në Bradashesh, kontroll në qelinë ku mbahet Ergys Agasi! Sekuestrohen disa celularë, dyshime se kujt i përkasin

 

Në orën 23:00 të mbrëmjes të së hënës, agjentët e Byrosë Kombëtare të Hetimit zbarkuan në paraburgimin e Bradasheshit. Në qelitë e tij mbahen të izoluar njerëz problematikë të botës së krimit, mes tyre Ergys Agasi dhe Oresty Sota.

 

Në sektorin ku ata janë izoluar është ushtruar kontroll blic nga agjentët, të cilët, sikurse konfirmohet nga burimet, kanë gjetur në ambientet e përbashkëta 5 celularë, që u dërguan për ekzaminim në laboratorin e SPAK.

 

Në këtë mënyrë do të mund të përcaktohet se kush i ka pasur në përdorim celularët.

 

Kontrollet te qelia e Agasit, që akuzohet si kreu i një grupi kriminal që vepronte brenda Agjencisë Kombëtare të Shoqërisë së Informacionit, u kryen pak orë pas dorëheqjes së Adriatik Kupit si Drejtor i Përgjithshëm i Burgjeve.


“Merrni 3 mijë paund dhe shkoni në Shqipëri!” – Oferta e pazakontë e Britanisë për familjen siriane që kërkon azil

 

Një ofertë e pazakontë e Ministrisë së Brendshme britanike (Home Office) ndaj një familjeje siriane që kërkon azil në Mbretërinë e Bashkuar ka ngritur shqetësime për saktësinë e vendimmarrjes në sistemin britanik të emigracionit. Sipas një investigimi të publikuar nga gazeta skoceze The National, 39-vjeçari Fadi Alsakka, bashkëshortja e tij Lojain dhe dy fëmijët e tyre, Ayman, 11 vjeç, dhe Ayla, 10 vjeçe, të cilët jetojnë në Glasgow, kanë marrë një dokument nga Home Office ku u ofrohet ndihmë financiare prej 3 mijë paundësh për t’u zhvendosur në Shqipëri.

 

Në dokumentin e shqyrtuar nga gazeta britanike thuhet se kjo mbështetje financiare mund ta ndihmojë familjen të ndërtojë të ardhmen e saj afatgjatë në Shqipëri. Megjithatë, familja nuk ka asnjë lidhje me vendin tonë dhe asnjë prej anëtarëve të saj nuk ka qenë ndonjëherë në Shqipëri.

Duke folur për The Sunday National, Fadi Alsakka e ka cilësuar rastin si një gabim serioz administrativ, me pasoja potencialisht të rënda për njerëzit që kërkojnë mbrojtje ndërkombëtare.

 

“Gabime të tilla nuk mund të tolerohen kur kontrollon jetën dhe të ardhmen e njerëzve. Mund të jetë një gabim fatal”, është shprehur ai. Sipas gazetës, ky nuk është problemi i parë që familja ka hasur me administratën britanike. Në një rast të mëparshëm, Home Office ishte detyruar t’i dërgonte gjashtë herë kartat britanike të identifikimit, pasi në pesë përpjekjet e para kishte vendosur gabimisht fotografinë e djalit të familjes në dokumente. Por shqetësimi më i madh i familjes lidhet me vendimin për refuzimin e kërkesës së azilit, të cilin ata e kanë kundërshtuar në gjykatë.

 

Sipas Alsakka, autoritetet kanë bërë një tjetër gabim të rëndësishëm në interpretimin e ngjarjeve mbi të cilat mbështetet kërkesa e tij për mbrojtje. Ai ka shpjeguar se një incident që i kishte ndodhur në Siri gjatë vitit 2025 ishte paraqitur në dokumentacionin e refuzimit sikur të kishte ndodhur në vitin 2023. Për më tepër, autoritetet kishin përdorur një vizitë që familja kishte kryer në Siri në vitin 2023, për të takuar një të afërm në gjendje të rëndë shëndetësore, si argument se familja nuk përballej me rrezik në vendin e origjinës. Alsakka e ka kundërshtuar këtë arsyetim, duke theksuar se incidenti mbi të cilin mbështetet kërkesa e tij për azil kishte ndodhur dy vjet pas asaj vizite.

 

Home Office i sugjeron edhe rikthimin në Alepo

Dokumenti i shqyrtuar nga The Sunday National nuk përmbante vetëm propozimin për zhvendosjen në Shqipëri. Sipas gazetës, autoritetet britanike kishin sugjeruar gjithashtu se familja mund të ndërtonte një jetë të re në një qytet sirian, si Alepo. Për Fadi Alsakka, të dyja alternativat përfaqësojnë një shkëputje nga jeta që familja ka ndërtuar në Skoci dhe një rikthim drejt pasigurisë. 39-vjeçari ka treguar se pjesën më të madhe të jetës e ka kaluar jashtë Sirisë dhe se nuk ka më lidhje të forta familjare apo shoqërore me vendin e origjinës.

 

Ai ka jetuar vetëm dhjetë vjet në Siri, ndërsa fëmijët e tij kanë lindur jashtë këtij vendi. Për këtë arsye, sipas tij, rikthimi në Siri do të ishte pothuajse po aq i huaj sa zhvendosja në Shqipëri. Alsakka ka vënë në dukje edhe kontradiktën mes qëndrimit të autoriteteve britanike ndaj qytetarëve të tyre dhe trajtimit të azilkërkuesve.

 

Ndërsa qeveria britanike këshillon shtetasit e saj të mos udhëtojnë drejt Sirisë për shkak të kushteve të paparashikueshme të sigurisë dhe kërcënimeve terroriste, familjeve që kërkojnë azil u sugjerohet rikthimi në këtë vend.

 

Dyshimet për përdorimin e inteligjencës artificiale

Një tjetër aspekt i rëndësishëm i raportimit lidhet me dyshimet e familjes se gabimet në dokumentacion mund të kenë ardhur si pasojë e përdorimit të inteligjencës artificiale në proceset administrative.

 

Lojain Alsakka, e cila ndjek studimet master për inteligjencën artificiale në Universitetin e Glasgow-t, dhe bashkëshorti i saj, që po ndjek një program të dytë master në Universitetin e St Andrews, kanë shprehur shqetësimin se përpjekjet për të përshpejtuar shqyrtimin e dosjeve të azilit mund të ndikojnë në cilësinë e vendimeve.

 

The National i referohet edhe një raportimi të gazetës The Independent, sipas të cilit sistemet e inteligjencës artificiale të përdorura nga Home Office për përshpejtimin e vendimmarrjes nuk kishin përmbushur standardet e saktësisë në 22% të rasteve të shqyrtuara.

Megjithatë, gazeta skoceze sqaron një detaj thelbësor: sipas informacionit që ajo ka siguruar, inteligjenca artificiale nuk është përdorur për përgatitjen e letrës që përmbante gabimin me Shqipërinë.

 

XS
SM
MD
LG