Lidhje


Daçiç nuk tërhiqet, përsërit deklaratën për rikthimin e flamurit serb në Prizren: Guxoj ta them!

 

Ministri i Brendshëm i Serbisë, Ivica Daçiç, nuk tërhiqet nga deklarata se flamuri serb do të valëvitet sërish në Prizren. Pas reagimeve që shkaktoi ky qëndrim, kreu i Partisë Socialiste të Serbisë ka përsëritur pretendimet e tij gjatë një tubimi elektoral në Beograd, duke këmbëngulur se Serbia nuk do të heqë dorë nga Kosova.

 

Daçiç iu përgjigj edhe ish-ministrit gjerman Michael Roth, i cili kishte kritikuar deklaratën e tij për Prizrenin. Në vend që të distancohej nga qëndrimi i mëparshëm, ministri serb e mbrojti atë, duke iu referuar historisë dhe luftërave të Serbisë.

 

“Ai tha: Si guxon Daçiç të thotë diçka të tillë? Epo, unë guxoj! Ne jemi ndryshe nga të tjerët. Guxojmë, sepse kështu mendojmë dhe sepse Kosovën e Metohinë i kemi mbrojtur me luftë. E sidomos unë guxoj ta them këtë, sepse kam lindur në Prizren, ku sot jetojnë më shumë se 20 serbë. Tridhjetë vjet më parë, atje jetonin më shumë se 10.000 prej tyre”, deklaroi Daçiç.

 

Duke iu referuar së kaluarës historike të Prizrenit, ai la të kuptohet se rikthimi i kontrollit serb mbi Kosovën mbetet një synim që mund të realizohet në të ardhmen.

“Nuk ka pse të ndodhë nesër, por do të ndodhë ashtu siç kemi bërë edhe më parë. Ne pritëm katër shekuj e gjysmë”, u shpreh ai.

 

Ministri serb e cilësoi Kosovën jo si një mit, por si një çështje territoriale për të cilën Serbia duhet të vazhdojë të luftojë politikisht, duke përsëritur qëndrimin se nuk mund të ketë Serbi pa Kosovën.

Në fjalimin e tij, Daçiç vlerësoi edhe figurën e ish-presidentit serb Slobodan Millosheviç, të cilit i atribuoi rikthimin e lavdisë kombëtare të serbëve. Ai theksoi gjithashtu se do të vazhdojë përpjekjet diplomatike për të penguar njohjen ndërkombëtare të pavarësisë së Kosovës.

 

“Unë ndihmova më shumë se 20 vende të tërheqin njohjen e tyre për pavarësinë e të ashtuquajturës Kosovë. Nëse ne jemi faktor, do të vazhdojmë me atë politikë. Edhe 10, 20 vende të tjera do të tërheqin njohjen e tyre për Kosovën. Ne po e vazhdojmë këtë luftë”, deklaroi ai.

 

Daçiç rikonfirmoi edhe orientimin e tij drejt Rusisë dhe Kinës, të cilat i konsideron aleatët kryesorë të Serbisë në kundërshtimin e pavarësisë së Kosovës.

“Rusia, Kina dhe të tjerët që votojnë kundër Kosovës në organizatat ndërkombëtare janë miqtë tanë. Dhe asnjë sanksion, asnjë armiqësi ndaj tyre nuk është në diskutim. Unë nuk jam rusofil, jam serbofil. Na duhet kjo për hir të Serbisë”, tha ai.

 

Deklaratat e përsëritura për Prizrenin vijnë në një kohë kur Daçiç po e përdor çështjen e Kosovës si një nga temat kryesore të fushatës politike. Kreu i socialistëve serbë ka shprehur gjithashtu ambicien për të kandiduar për president të Serbisë në zgjedhjet e ardhshme presidenciale.

 

Partia Socialiste e Serbisë, e themeluar nga Slobodan Millosheviçi, garon me sloganin “Faktori i Stabilitetit”, ndërsa drejtuesi i saj vijon të mbrojë publikisht pretendimet e Beogradit mbi Kosovën, duke rikthyer në diskursin politik retorikën nacionaliste të së kaluarës.


Ministri i Jashtëm i Izraelit në Tiranë, sot do të takohet me Ramën, Peleshin dhe Hoxhën

Në fokus të bisedimeve mes diplomatit izraelit dhe përfaqësuesve të lartë të shtetit shqiptar pritet të jetë forcimi i bashkëpunimit dypalësh dhe marrëdhëniet mes dy vendeve.

 

Ministri i Jashtëm i Izraelit, Gideon Sa’ar, ka mbërritur mbrëmjen e djeshme në Tiranë, në kuadër të një vizite zyrtare në Shqipëri.

 

Gjatë ditës së sotme, Sa’ar pritet të zhvillojë takime me kryeministrin Edi Rama, kryetarin e Kuvendit, Niko Peleshi, si dhe ministrin për Evropën dhe Punët e Jashtme, Ferit Hoxha.

 

Në fokus të bisedimeve mes diplomatit izraelit dhe përfaqësuesve të lartë të shtetit shqiptar pritet të jetë forcimi i bashkëpunimit dypalësh dhe marrëdhëniet mes dy vendeve.

 

Shqipëria dhe Izraeli kanë pasur ndër vite marrëdhënie miqësore, të mbështetura edhe në lidhjet historike mes dy popujve. Një nga elementet e rëndësishme të kësaj historie është fakti se Shqipëria strehoi dhe shpëtoi hebrenj gjatë Luftës së Dytë Botërore.

 


Një rrëfim i fortë i kryeministrit të Kosovës, Albin Kurti, për vitet e tij si i burgosur politik në Serbi po rikthehet në vëmendje

 
Në intervistën për median britanike “The Rest Is Politics: Leading”, Kurti tregoi se periudhën e parë të burgimit në Serbi nuk e konsideronte thjesht burg, por “si një kamp përqendrimi”.
 
 
Ai tha se gjatë vitit 1999 kishte humbur rreth 30 kilogramë, ndërsa torturat nga gardianët ishin sistematike dhe në raste të caktuara përsëriteshin disa herë brenda ditës.
 
 
Kurti rrëfeu se të burgosurit goditeshin me shkopinj nga disa gardianë njëkohësisht.
Pjesa më e rëndë e dëshmisë së tij lidhet me pasojat e dhunës:
 
“E humba vetëdijen mbi 40 herë gjatë torturave. Nuk kisha mundësi as ta imagjinoja se do të dilja gjallë.”
 
Kurti ishte vetëm 24 vjeç kur u arrestua nga autoritetet serbe në prill të vitit 1999. Ai kaloi gjithsej 2 vjet e 7 muaj në burg, fillimisht gjatë regjimit të Sllobodan Millosheviçit dhe më pas gjatë periudhës së Vojisllav Koshtunicës.
 
 
Ai tregoi gjithashtu se më 10 qershor 1999, gjatë tërheqjes së forcave serbe nga Kosova, autobusët me të burgosur shqiptarë ishin vendosur mes kolonave të policisë dhe ushtrisë serbe, sipas tij, për t’i përdorur si mburojë ndaj bombardimeve të NATO-s.


Tre orë pas emërimit, jep dorëheqjen Drejtori i Kadastrës Elbasan. Ja kush e zëvendëson

 

ELBASAN- Drejtori i Kadastrës në Elbasan, Everest Gazheli ka dhënë dorëheqjen nga posti i tij vetëm tre orë pas emërimit. Ai është zëvëndësuar nga Gentian Mahmutaj, i cili më herët mbante detyrën e përgjegjësit të sektorit tekniko-ligjor në Drejtorinë e Përgjithshme të ASHK-së.

 

Dorëheqja e Gazhelit vjen vetëm pak orë pas emërimit të tij në krye të institucionit, ndërsa shkaqet e këtij vendimi mbeten ende të paqarta


Vizita surprizë në SPAK, dy takime brenda pak ditësh! Çfarë garancie po jep ambasadori i ri amerikan për Prokurorinë e Posaçme?

Ambasadori i ri i Shteteve të Bashkuara të Amerikës në Tiranë, Eric Wendt, ka zhvilluar një tjetër takim me drejtuesin e Prokurorisë së Posaçme, Klodian Braho.

 

Vizita, e dyta brenda pak ditësh, ngre pikëpyetje mbi mesazhet që diplomacia amerikane po përcjell në drejtim të institucionit që heton korrupsionin dhe krimin e organizuar në Shqipëri.

 

Ambasadori amerikan është shoqëruar nga përfaqësues të ambasadës së SHBA-së, të cilët janë parë duke dalë nga ambientet e SPAK.

 

Takimi vjen vetëm pak ditë pas vizitës së parë të Wendt në Prokurorinë e Posaçme, në kuadër të marrjes së detyrës së tij të re diplomatike në Tiranë.

 

Takimi i parë, i zhvilluar më 5 tetor, kishte në fokus luftën kundër krimit transnacional, trafikut të narkotikëve dhe migracionit të paligjshëm. Në njoftimin e saj, Ambasada Amerikane theksoi edhe rolin vendimtar të institucioneve të pavarura në përballimin e këtyre sfidave.

XS
SM
MD
LG